आमची सुवर्णनगरी

त्या नवीपेठच्या गल्ल्या ते गोलाणी मार्केट,

ती भव्य सतरा मजली उरात धडकी भरवते थेट !

त्या गणपतीच्या मिरवणुका तो निवांत मेहरूण,

आठवता माझं जळगाव चित्तवृत्ती उठतात मोहरुन !

बालपणाच्या स्मृती जपलेलं ते गांधी उद्यान

नवीपेठचा रास गरबा म्हणजे जळगावची शान !

तो तरसोदचा रम्य परिसर ते गणरायाचे सुंदर देऊळ,

मनातल्या कोलाहलाला पूर्णविराम देणारे हेच ते राऊळ !

त्या राजमल लखीचंद अन् बाफनाच्या भव्य सुवर्णपेढ्या,

त्यांनी घडवलेले रेखीव दागिनेच परिधान करत आल्या इथल्या कित्येक पिढ्या !  

राज्याच्या कानाकोपऱ्यातून येतात अन् इथलं सोनं घेऊन जातात,

अनेक लेकीबाळी विवाहात इथल्याच सोन्याला प्राधान्य देतात ! 

ते टॉवरचं घड्याळ ती जोगळेकरची कचोरी,

आकर्षक फुले मार्केट मधले ते छोटे मोठे व्यापारी !

साजशृंगार,गृहसजावट,वस्त्रप्रावरणे सगळेच इथे मिळते,

बदलत जाणारी फॅशन इथे खरेदी करणाऱ्या प्रत्येकाला कळते !

सत्तरीची असो नार किंवा असो पाळण्यातील बाळ,

प्रत्येकाचीच जुळली आहे या बाजाराशी अतूट नाळ !

सणावारी तर भरते इथे जणू जिल्ह्याची जत्रा ,

सर्वत्र चालते इथे फक्त उत्साहाचीच मात्रा !

गौरी गणपती नवरात्र दसरा अन् दिवाळी

या दिवसांत तर असते खरी चैतन्याची मांदियाळी !

मनसोक्त खरेदी केल्यावर दिसते ती चंदुलाल रसवंती,

गारेगार रस प्राशन करून चैतन्याने मग उजळते कांती !

दिवाळीत आपली पावले आपोआप शिवतीर्थाकडे वळतात,

यंदाच्या वर्षी आलेले फटाक्यांचे नवीन प्रकार तेव्हाच कळतात !

भव्य त्या मैदानावर अनेक लहान मोठे मंडप सजतात,

भरपूर फटाके घ्यायचे बेत मनात रुजत असतात !

अमाप खरेदी झाली तरी लेवा बोर्डिंगचा सेल पाहूया,

छोट्या मोठ्या काही गोष्टी घेण्यासाठी तिथेच जाऊया !

दिवाळीनंतर फिरण्यासाठी बुकिंग आत्ताच करून घेऊ,

त्यानिमित्ताने पुन्हा एकदा स्टेडियम कॉम्प्लेक्स फिरून येऊ !

बघता बघता संध्याकाळ झाली आता नेहरू चौकात जाऊ,

सतरा मजली खालच्या खाऊगल्लीत पेटपुजा करून घेऊ !

शतपावली करत करत आता निशेचे स्वागत करू,

आठवणींच्या गावात चांदण्या मोजत जागत राहू !

अशी आमची ही सुवर्णनगरी जिच्या आहेत अनेक खासियती ,

आधुनिकतेसोबतच जपल्या जातात इथे परंपरा अन् रीती-भाती !