ती आणि तिचे प्रश्न

आज आले तर आहे मी माझ्या आईच्या गर्भात 

पण उद्या तिच्या कुशीपर्यंत पोचेन का ?

मायेच्या मऊ कुशीत पोचले मी देवा एकदाची 

पण बाबांचा प्रेमळ स्पर्श मला होईल ना ?

आज तर बाबाने चक्क दिवसभर मलाच धरून ठेवलं

पण उद्या अजून एखादा किंवा एखादी आली तरी माझे असेच लाड होतील का ?  

चला शाळेला जायची वेळ झाली लाडूबाई

पण शाळेत कुणी त्रास दिला तर त्याला मी धडा शिकवू शकेन ना ? 

कालपर्यंत होते आई बाबांची बाहुली, आज मी मोठी झाले

या चार दिवसांत होणारे माझे मुड स्विंग्ज सगळे समजून घेतील ना ? 

आजपर्यंत मी पाहिलेली स्वप्नं आता खरी होतील का ? 

दहावीच्या परीक्षेत मला मनासारखे गुण मिळतील ना ? 

पहिल्यांदाच चालले आहे मी आज बाबाला सोडून

हॉस्टेलला बाबासारख्या जीव लावणाऱ्या मैत्रिणी असतील का ?

सुटले बाबा एकदाची अन् मिळवली डिस्टिंक्शन मध्ये पदवी

पण आता लगेच माझ्या लग्नाचा घाट घातला जाणार का ? 

स्वतःच्या पायांवर उभं राहायचं आहे मला, नाव कमवायचं आहे ,

पण मग ते करण्याच्या नादात माझ्या मागे दुसरं नाव लावणं राहून तर जाणार नाही ना ? 

पाहिलं मी त्याला..जणू स्वप्नातला राजकुमारच तो माझ्या,

पण त्याच्या पोटातून त्याच्या हृदयात जाणाऱ्या मार्गावर तो मला येऊ देईल का ? 

विश्वास बसत नाही, त्याला माझ्यात त्याची अर्धांगिनी दिसली,

पण त्याला भावले तशीच त्याच्या कुटुंबालाही मी भावेन ना ? 

वाढले ज्या घरात २४ वर्ष, आता २४ तासांत या भिंतींना मी परकी होणार , 

पण स्मृतींनी गंधाळलेल्या या वास्तूला वरचेवर माझे पाय लागतील का ? 

नव्या दुलईतला नवा संसार आता वास्तवाचे अस्तित्व बघणार

या नव्या वाटेवर मला काटे मिळू देत, पण फुलांचे ताटवेही मिळणार ना ?

त्याच्या माझ्या नात्याची वीण आता अजूनच घट्ट होणार, 

पण जसं माझं या जगात स्वागत झालं तसं माझ्या पोटी लेक आली तर तिचंही होणार का ? 

माझ्या अंगणातली चिमणी आता पुन्हा माझ्याच वाटेवर जाणार

पण मैत्र मेळाव्यात वावरणारी माझी सावली माझीच साथ सोडणार नाही ना ? 

जशी अनेक वर्षांपूर्वी मी आले, तशीच अजून एक माझ्या लेकाच्या आयुष्यात येणार

पण मला सासू न समजता मैत्रीण तिने समजावं अशी तर मी वागू शकेन का ?

कालपर्यंत जोडून ठेवलेली लेकीची नाळ आता दुसऱ्याच्या घराशी बांधावी लागणार

पण माझ्यातल्या आईचा पदर एकटाच मागे राहणार नाही ना ? 

आज नवी पदवी मिळाली मला जी दिली दुधावरच्या सायीने,

आता माझं आणि माझ्या दुसऱ्या लेकीचं नातं अधिक दृढ होईल का ? 

आताशा गोष्टी पहिल्यासारख्या राहिल्या नाहीत, सगळंच बदललं

पण या बदललेल्या वातावरणात मला जुळवून घेता येईल ना ? 

थकत चालला हा देह आता, पैलतीर दिसू लागला

पण मागे राहिलेल्यांना माझ्या विरहातून सावरता येईल का ? 

परमेश्वरा, माणूस म्हणून घडून, माणूस घडवून तुझ्याकडे परत आले आहे

पण संस्कारांची शिदोरी वाटत राहण्यासाठी पुढचाही जन्म मला पुन्हा एकदा तू माणूस म्हणूनच देशील ना ?