आपला श्रावण

हिरवाईचा साज लेवुनी सजली सारी धरती ,

नेत्रसुख देणारी अवनी पाहुनी येई आनंदाला भरती ! 

चोहोबाजू दिसते मजला सृष्टीचे लावण्य , 

जणू निसर्गाने दिधले धरेला अक्षय्य ते तारुण्य ! 

श्रावण म्हणजे ऊन पाऊस श्रावण म्हणजे झुला ,

श्रावण म्हणजे सुखांची हंडी श्रावण म्हणजे आनंदाचा काला !

श्रावण म्हणजे माहेरची सय जी आणते डोळ्यांत पाणी ,

श्रावण म्हणजे माहेरच्या पारिजातकाच्या मिठीतली गोड गाणी !

श्रावण म्हणजे शिव शंभो तर श्रावण म्हणजे मंगळागौर ,

श्रावणातल्या चैतन्याची मजाच असते काही और !

श्रावण गाणी गाताना दिसे समोर आठवणींचा पट ,

आयुष्यातील श्रावण म्हणजे अनुपम असा मधुघट !

श्रावण म्हणजे नानाविध व्रत वैकल्यांची पर्वणी , 

अनुभवता हा सुखद अन् रम्य श्रावण ,

जीवनी हिरवळीची होते पायाभरणी !