आली दिवाळी

येणार येणार म्हणता म्हणता पाहा ती आली,

अहो कोण काय विचारता तुमची आमची दिवाळी !

घर सजले,अंगण सजले आणि उल्हसित झाली मने,

दीपावलीच्या स्वागतासाठी नव्याने मोहरली सुमने !

तोरणे, माळा,पणत्या,पताकांनी सजल्या बाजारपेठा,

धन खर्चापेक्षा आहे तेजाळत्या जीवनांचा आनंद मोठा !

गेरूने सारवलेले अंगण आता पुन्हा एकदा प्रसन्न हसेल,

आयुष्याच्या रांगोळीत आता नवचैतन्याचा रंग वसेल !

घरोघरी आता तयार होतील फराळ अन् मिष्टान्नाची ताटे,

चमचमत्या प्रकाशाचे कवडसे पाहता नेत्री आनंद दाटे !

गाय गोऱ्हा, यम कुबेर अन् लक्ष्मीचे सर्वत्र होईल पूजन,

सुख समृद्धी वर्दी देता समाधानाचे चौफेर होईल कुजन !

सर्वत्र विजयश्री मिळो म्हणुन पाडव्याला होते पतीऔक्षण,

मनात रेंगाळती अशा वेळी एकमेकांच्या सहवासाचे हळवे क्षण !

बहिणीच्या घरी भोजन करता भाऊरायाची आपदा दूर पळे,

अशा पुनीत भाऊबीजेचे महत्त्वही तसेच आगळे वेगळे !

तुळशी विवाह संपन्न होता मग निरोप घेते ही आपली दिवाळी,

वर्षभर मात्र तिच्या आठवणींची मनात जागृत असते मांदियाळी !