कोकण

आठवांचा पूर येता मनी दाटते, साठते कोकण

हिरव्या-कंच पाचुच्या रानात कसा झरतो,बागडतो श्रावण

अल्लड पायवाटा कशा झिम्मा खेळती मातीशी

रानफुले हर्णीची डुलत गाती संवादी सरींशी

सागर फेसांचे बंध जुळता ऊन्हाशी,झरे काठाशी लवण

हिरव्या-कंच पाचुच्या रानात कसा झरतो,बागडतो श्रावण

निनादते सर, गुंजते राऊळ, श्रावणी सोमवार सजे

कौलारु घर, सळसळे पोफळ, वा-याचे पैंजण वाजे

झावळ्या आडून ऊन्हाचे शृंगार भासे घराला सोनेरी लिंपण

हिरव्या-कंच पाचुच्या रानात कसा झरतो,बागडतो श्रावण

ऊन्हे न्हाऊनी धवल, पिवळी काचोळी नेसला चाफा

दिपल्या क्षणांचा लपत्या सरींचा मृगजळी पक्ष्यांचा ताफा

निर्झर झरझर वाहुनी खळखळ करिती मोत्यांचे शिंपण

हिरव्या-कंच पाचुच्या रानात कसा झरतो,बागडतो श्रावण