एकट्याचा प्रवास

एकट्याने प्रवास करताना

माथी आठवणींची मोळी

वेचलेले अनुभव काटेरी

उसवली तरी टिकून झोळी.

एकट्याने प्रवास करताना

चिंता सोडावी वाऱ्यावर

हव्या-नकोची करून तजवीज

मन ठेवावं नित्य थाऱ्यावर.

आला एकटाच जीव जगती

कुणी चालवतो धरुन बोटा

पंख फुटले की सुरू अविरत

एकट्याचा संघर्षाचाच रेटा.

सुखाचे वाटेकरी सारे सोयरे

दुःखाला धडक फक्त स्वतःला

ज्या हाताने वाटले भरभरून

मलमही लावत नाही कुणी वेळेला.

प्रवास एकट्याचा असला तरी

रुजवावीत मायेची रोपटी चार

अखेरच्या प्रवासाला निघताना

देतात तीच विश्रांती घटका चार.