बाप शब्द लिहिताना...

गाथा बापाची सांगतो ,

ऐक ऐक माझ्या दोस्ता ...

मला घडवण्यासाठी, 

बाप किती खातो खस्ता ..

सदा नशीब बापाशी

खेळ खेळत राहीला ...

बाप मुकाट होऊन

घाव झेलत राहीला ...

फाटलेल्या सदऱ्याला ,

बाप ठिगळं लावतो ..

उसवल्या नशिबाला ,

बाप घामाने शिवतो ..

बाप दुष्काळ झेलतो ,

उरातल्या दमावर ..

बाप सोन पिकवतो ,

अंगातल्या घामावर ..

आयुष्याचा केला होम 

त्याचे झिजलेले तन ...

तुझ्या कष्टाचा रूपया ,

मला कुबेराचे धन ...

डोंगराहुनही उंच,

माझ्या बापाचं कर्तृत्व ...

धर्मग्रंथांपेक्षा श्रेष्ठ, 

माझ्या मायेचं मातृत्व...

त्याच्या घामाच्या थेंबाने ,

माझे आयुष्य घडते ...

बाप शब्द लिहिताना ,

माझी लेखणी रडते ...