आजचा विषय - भय

किर्रर्र काळोख नभी दाटला 

दूरवर दिसली एकच झोपडी

चालून चालून थकलेलेच पाय

व्याकूळ तहानेने कोरड नरडी

भयाण काळोखात एकलीच मी

झोपडीतून झळकला एक दिवा

आला माझ्या जीवात जीव जरा

झोपडीत समोरच टांगलेला तवा

भिऊन चरकलेच माझे तनमन

तव्यामागे चमकलेच लाल डोळे

रोम-रोम जागे अंगावरही शहारे

पायांमध्ये आले मणमणाचे गोळे

टांगलेले उलटे रक्ताळलेले शरीर 

कानातून अतितप्त अग्निज्वाला

ओरडताना माझी बोबडी वळली

थंडीतही अंगाला या घाम फुटला

कानाजवळ हळूच आवाज आला

भिऊ नकोस बाळा मी हडळ हाय

काय हवेय भूक लागली का तुजला 

झोपडीत माझ्या तुझे लागलेत पाय

रक्ताळल्या तोंडातल्या उग्र दर्पात 

घाणीने मळमळुन केली मी उलटी

समोर पाहू जाता होते भयंकर दृश्य

लटकल्या प्रेताची प्रतिमा ती सुलटी

पळायला गेले तो आवाज घुमला

गरमच जेवण सर्व भाजीही ताजी

जखडून गेले जणू दोन्ही माझे पाय

रक्ताची खीर नि कलेज्याची भाजी