आधारवड

ज्यांना मिळतो आशीर्वाद 

देवस्वरुप आईवडीलांचा

पुण्य लाभते संचिताचे 

मिळे आधार ज्येष्ठांचा ||१||

ते असतात आपले आधारवड

अनुभवांची असते खाण

रीतीभाती, सोवळे, ओवळे

उपाय असतो रामबाण ||२||

वडीलधारे असता सोबत

संकटात हत्तीचे बळ

प्रेम, माया, ममतेने

लाभते सहवासाचे फळ ||३||

ज्येष्ठ असता आसपास 

नित्य खुले राहते दार

अखंड नंदादीप तेवतो

संस्कारात नांदते घर ||४||

ज्येष्ठ असतात दुवा 

दोन पिढ्यांना सांधणारा 

पूल असतो ज्ञानाचा

भूत, भविष्याला बांधणारा ||५||

थोरामोठ्यांची साथ

हीच तर खरी पुण्याई 

वडीलधारे आपल्यासाठी

साक्षात विठ्ठल रखुमाई ||६||