વ્હાલનાં વાદળ ચડે વરસાદમાં
વ્હાલનાં વાદળ ચડે વરસાદમાં
વ્હાલનાં વાદળ ચડે વરસાદમાં;
યાદના ફોરાં પડે વરસાદમાં.
જાણે હો દીવાલ આડે આભમાં;
આંગણું કોરું રડે વરસાદમાં.
કે તિમિર મેઘલ બને છે તેજીલો;
વિરહી રાત્રી અડે વરસાદમાં.
રોજ તારી આંખમાં છે વરસવું;
તેજ સૂરજનું નડે વરસાદમાં;
પાંપણો છલકાય આષાઢી ક્ષણે;
યાદ તારી ગડગડે વરસાદમાં.
એકધારા રાત'દિ ભીંજાવવા ;
મેઘ નાં ટીપાં લડે વરસાદમાં .
મન તરાવે હોડી કાગળની 'દિલીપ';
મૈત્રીની મિરાત જડે વરસાદમાં.