સ્વપ્ન સહેલ મંગળની

સ્વપ્ન શ્રુષ્ટિ મારી કેવી નિરાળી 

ધરું પ્રતિપલ નવાં રૂપ નવાં વેશ

ત્યાં નથી કુતુહલની કોઈ સીમા

ત્યાં તો અગણિત તારાઓનો દેશ

વગાડતાં ચપટી ઉડનખટોલું હાજર

પહેર્યો મે તો અવકાશયાત્રી પહેરવેશ

મિશન મોટું આજે ઉડવું દરિયાપાર

ખેડવો કલ્પનાતિત પરગ્રહ પ્રદેશ

મોજે ઉપડી સવારી અનંત આકાશે

નહી નકશો કેવો હશે અજાણ્યો દેશ

છોડી રૂપકડી નીલવર્ણી ધરતી મારી

દેખ્યો કદિ ન એનાં સમો અન્ય પ્રદેશ

દિવસ-રાત એક થયા અવકાશી સહેલે

આખરે ભાળ્યો કોઈ રતુમડો દેશ

ન કોઈ વૃક્ષ વેલી, ન તો પશુ પંખી

વેરાન ધગધગતો લાલ આ કેવો પ્રદેશ

સાંભળ્યો અચાનક કોઈનો સાદ

પરગ્રહવાસીનો અજીબ લીલો વેશ

આવો હળીમળીને રહીશું અહીં જ

પૃથ્વી સમો કરો આ મંગળ પ્રદેશ

ભૂલ્યા ભાન આધુનિકતાની દોડમાં

કર્યું અમંગળ જેનું, હતો એ મંગળ દેશ

હેતે કરજો જતન તમ પૃથ્વીલોકનું

સકલ બ્રહ્માંડે પૃથ્વી જીવંત પ્રદેશ

ધન્ય 'દીપાવલી' પૃથ્વી પર જન્મી

પૃથ્વી સરીખો ન અન્ય મંગલ દેશ

એક સવાર મંગળ પર એવી ઉગશે

હોય હરિયાળી ને લીલો વન પ્રદેશ