ઉગારજે કાન્હા હવે

મજધારમાં મુજ નાવડી, તું તારજે કાન્હા હવે !

પતવાર દીધી હાથમાં, ઉગારજે કાન્હા હવે !

પીડે ઘણાં દ્વેષો મને, દલદલ મહીં હું ખૂંપતી,

દઈ જ્ઞાન સાચા કર્મનું, તું ડારજે કાન્હા હવે !

વણઝાર આવે કામનાની, ચેન સઘળું ચોરતી,

સંતોષનું અમરત ધરી, તું તારજે કાન્હા હવે !

મધરાત માની ઊંઘતી આળસ, પ્રમાદે રાત દિન,

આપી કિનારો, અવગુણો ભંડારજે કાન્હા હવે !

રણકાર ખોવાયો હૃદયથી, ભાવ ઉરથી ગ્યો ખરી, 

ભીનાશ 'શ્રી' ના દિલ મહીં, શણગારજે કાન્હા હવે !