સરદારનું ગીત - ર૭

હૈડિયા વેરો-૧ (ઈ,સ, ૧૯ર૩)

હવે વલ્લભભાઈના, બોરસદે મુકામ રે;

બહારવટિયા લૂંટે, આ બોરસદ ગામ રે,

પોલીસ ન શકે બાંધી, થઈ જાય નિરાશ રે;

દોષનો ટોપલો ઢોળે, લોકો ઉપર ખાસ રે,

બહારવટિયાને તો, આશ્રય છે અપાય રે;

તેથી પોલીસથી એને, પકડી ન શકાય રે,

લોકો ઉપર પોલીસે, આવું નાખેલ આળ રે;

કોની આગળ આ લોકો, કાઢે હૈયાવરાળ રે,

મુકાણી વધુ પોલીસ, લોક રક્ષાણકાજ રે;

પોલીસ ભોગવે આવી, લોકો ઉપર રાજ રે,

પોલીસનો બધો ખર્ચો, લોકો માથે નખાય રે;

એના માટે કરી લીધી, દંડની જોગવાય રે,

કે’વાયો હૈડિયા વેરો, એવો નાખેલ દંડ રે;

પોલીસ કરવા લાગી, એથી વધુ ઘમંડ રે,

કરી વલ્લભભાઈને, લોકોએ ફરિયાદ રે;

તપાસ કરવા માંડી, ટાળવા વિખવાદ રે,

વિગતોના મસાલાનો, થઈ ગયેલ ગંજ રે;

ચોખવટ કરી નાખે, જેથી રહે ન રંજ રે,

રવિશંકર જેવાનો, પૂરો મળેલ સાથ રે;

સાથે મોહન પંડયાજી, દેતા રહેલ હાથ રે,

અત્યાચારો સહે જેઓ, એનો થયેલ દંડ રે;

દેનાર સાથ ગુંડાને, ફરે વગર દંડ રે,

આવું વલ્લભભાઈથી, જરાયે ન સહાય રે;

આપી સલાહ લોકોને, આ દંડ ન અપાય રે,

લડત કાજ લોકોને, કર્યા છે સાવધાન રે;

સરકાર ભલે લૂંટે, મૂકવું ન સ્વમાન રે,

સ્વયંસેવક તૈયાર, લડત કાજ થાય રે;

ભેદભાવ બધા મૂકી, એક બની લડાય રે,

**

આ સ્વયંસેવકોમાંથી, ટુકડીઓ પડી ગઈ;

લડવા ટુકડી મોર્ચે, હર્ષથી હાલતી થઈ.

(ક્રમશ:)