સરદારનું ગીત - ૧ર

રાજકીય પ્રવેશ (ઈ,સ, ૧૯૧પ-’૧૬)

ગુજરાત સભા દ્વારા, રાજ્યનું કામ થાય રે;

અમદાવાદમાં ત્યારે, પરિષદ ભરાય રે,

સાથે વિઠ્ઠલભાઈની, વલ્લભ પણ જાય રે;

રાજકારણમાં ઠંડા, રસ નો’તો જરાય રે,

ગાંધીની વાત તેઓને, આકર્ષી ન શકેલ રે;

ધીમે ધીમે છતાં તેનું, આકર્ષણ થયેલ રે,

મિત્ર આગ્રહથી તેઓ, સભાના સભ્ય થાય રે;

કમિશનરને જેથી, અંકુશમાં રખાય રે,

ગોધરામાં હવે એક, પરિષદ ભરાય રે;

કામ ચાલુ રહે માટે, કારોબારી રચાય રે,

તેમાં વલ્લભભાઈને, તેના મંત્રી નિમાય રે;

જેથી જવાબદારીથી, સતત કામ થાય રે,

કરવાનો હતો તેણે, વેઠધારા વિરોધ રે;

કમિશનરને કર્યો, પત્રથી અનુરોધ રે,

તે સાહેબ પત્રો વાંચી, ગુસ્સે ખૂબ ભરાય રે;

ફાડી નાખી પત્રોને ત્યાં, ટોપલીમાં નખાય રે,

લાગ્યું વલ્લભભાઈને, પ્રજાનું અપમાન રે;

લખ્યા બીજા પત્રો જેથી, સા’બને થાય ભાન રે,

સાહેબને પત્રે ત્રીજે, ચેતવણી અપાય રે;

તોયે સાહેબ માન્યા નૈ, પત્રિકાઓ છપાય રે,

પત્રિકા ગામડાંઓમાં, ઘેર ઘેર અપાય રે;

જેનાંથી વેઠધારામાં, ત્રાસ ઓછો કરાય રે,

અમદાવાદમાં ત્યારે, પ્લેગ થૈ નીકળેલ રે;

તેઓએ કામદારોના, જુસ્સાને જાળવેલ રે,

એના પછી પડેલો ત્યાં, ભયંકર દુકાળ રે;

એમાં રાહત દેવામાં, કરેલ દેખ-ભાળ રે,

ત્રીજી આફતનો માર, તાવરૂપે પડેલ રે;

ગુજરાત સભા ત્યારે, મદદમાં રહેલ રે,

**

રંગાયા છે હવે તેઓ, ગાંધીના ખૂબ રંગમાં;

હીરલો દેશસેવામાં, આળોટતો ઉમંગમાં.

(ક્રમશ:)