સરદારનું ગીત - ૧૯

ગાંધીને મળ્યો હીરો (ઈ,સ, ૧૯૧૯)

એ સત્યાગ્રહ ખેડાનો, ગાંધીજીને ફળેલ રે;

વલ્લભ નામનો હીરો, ત્યાં તેઓને મળેલ રે,

કરી વલ્લભભાઈએ, ગાંધીજીને સહાય રે;

કામ હોય ગમે તેવું, તેઓ આગળ થાય રે,

અમદાવાદમાં પાડે, મજૂરો હડતાળ રે;

સમજૂતી કરાવીને, કરાવે માંડવાળ રે,

સૈન્ય ભર્તી કરી આપે, અંગ્રેજોને સહાય રે;

મન દુભાય લોકોનાં, કેમ તૈયાર થાય રે ?

દુશ્મનોની સહાયે તો, કેમ કરી જવાય રે ?

આવી આ વાત લોકોને, જરા ન સમજાય રે,

ગાંધી-વલ્લભ આમાં કૈં, જુદો કરે વિચાર રે;

લોકો શીખી શકે એમાં, તાકતાં હથિયાર રે,

આવો સરસ મોકો છે, એ મૂકી ન શકાય રે;

પરંતુ જર્મની જીત્યું, ને ભર્તી રદ થાય રે,

રોલેટ કાયદો આવ્યો, એનો થયો વિરોધ રે;

લોકોમાં કાયદાથી આ, વ્યાપી ગયેલ ક્રોધ રે,

કર્યા અનેક લોકોએ, એ માટે ઉપવાસ રે;

કેટલોક સહે લોકો, અંગ્રેજી ઉપહાસ રે,

કરી વલ્લભભાઈએ, જિંદગી દેશ નામ રે;

પત્રિકા છાપવામાંયે, હોંશે કરેલ કામ રે,

ગાંધીને જેલમાં પૂર્યા, સાંભળતાં જ વાત રે;

લોકો ચડેલ તોફાને, પોલીસ થૈ મહાત રે,

ખૂંદે વલ્લભભાઈ તો, શાંતિ માટે શહેર રે;

ઘાયલોને પહોંચાડે, મદદ ઘેરઘેર રે,

ગાંધીજીની અવેજીમાં, લીધું હતું સુકાન રે;

ડામવા રમખાણોને, કાર્ય કર્યું મહાન રે,

તંગદિલી કરી શાંત, જૂઠ પાડયું બહાર રે;

તોયે મૂકી શકે કેમ, વિશ્વાસ સરકાર રે,

**

ગાંધીના સાથમાં તેઓ, ઝઝૂમતા પળેપળ;

દેશ બચાવવા માટે, બુદ્ઘિનું વાપરે બળ.

(ક્રમશ:)