Library
Profile
સંસાર જળ લાગે મુને ખારા
સંસાર જળ લાગે મુને ખારા
નીરખ્યું ભીતર ને ભેદ મટ્યા, દુઃખડા થયા બધા હવે દૂર
સમદ્રષ્ટિથી નિહાળ્યા આ સઘળા મિથ્યા જગતના મોલ,
હે જી ગગન મંડળમાં મોજ માણી
હવે તૂટ્યા આ ભ્રમ કેરા જાળાં
આ સંસાર જળ લાગે છે મુને બહુ ખારા,
અખંડ આનંદ હવે પ્રગટ્યો છે ઉરમાં
વાગે જુઓ ભક્તિ કેરા અઘોર નગારાં
આઠે પહોર જાય સુરતાં અકાશે
મારા હરિ હેરા હેત ઉભરાણાં,
આ સંસાર જળ લાગે છે મુને બહુ ખારા,
ઈંગળા ને પિંગળા શુદ્ધ શાંત બનીને હવે
ભિતરમાં આ મોરચા મંડાણા,
મનડું મારુ શાંત કર્યું તોય ભટકીને કરે ચાળા
આ સંસાર જળ લાગે છે મુને બહુ ખારા,
ગુરુ મળ્યા ને મારા સબ દુઃખ હર્યા
ભીતરમાં કર્યા ઘણાં અજવાળા,
સમદૃષ્ટિ ને પ્રેમ થકી ભેદ સાચા પરખાણા,
આ સંસાર કેરા જળ લાગે છે મુને બહુ ખારા,
નાદ ભક્તિનો હવે ગુંજે અંતરમાં
આતમ કરે ભીતર ઘણાં અજવાળા
પૂર ઉમટ્યા ભીતર ભક્તિનાં, ભાંગ્યા ભ્રમના જાળાં
આ સંસાર જળ લાગે છે મુને બહુ ખારા,
હરિનું 'રાજ ' હવે અમ અંતરમાં
ગુંજે જંતરનાં સૂરમાં ભજન પ્યારા
મોહ માયા હવે અળગી થઈ ને હેતે ભજન ગાઉં પ્રભુ તમારા,
આ સંસાર જળ લાગે છે મુને બહુ ખારા,
હે જી ગગન મંડળમાં મોજ માણી
હવે તૂટ્યા આ ભ્રમ કેરા જાળાં
આ સંસાર જળ લાગે છે મુને બહુ ખારા.
