રહેવા દે

ન થોપ તું મુજપર તારા વિચારો, રહેવા દે,

જમાના મને મારી નજરમાં સારો રહેવા દે,

નહિ માફ કરી શકું મને જો બદલી જઈશ,

મારી આ સોચ પર મારો ઈજારો રહેવા દે,

ઘસાયો છું કાયમ બધી જ બાજુએથી,

બને તો હવે છોડ, વધુ ઘસારો રહેવા દે,

મહેનત ઘણી લાગી છે પહોંચવાને અહીં,

હમણાં બુલંદ આ મારો સિતારો રહેવા દે,

ઓછી નથી પરેશાનીઓ આ 'સ્તબ્ધ'ની ક'ને 

ન કર એમાં હવે કોઈ વધારો, રહેવા દે,

કરીને આંખ બંધ પણ મેં જોઈ લીધું છે,

જેવો આવે નજરમાં તેવો નજારો રહેવા દે,

સાંખી નથી શકવાનો તને, છે ખબર મને,

મારી સાથે આ સ્વભાવ મારો રહેવા દે.