પ્રતીક્ષારત

ઘટમાળ જીવનની એવી તો ચાલતી રહી,

જાણે સમયનું વહેણ હું બનતી રહી...ઘટમાળ !

સંજોગોના ઢાળે સદા ખુદને હું ઢોળતી રહી,

ભાવિના જહાજને ભૂતના વમળે શોધતી રહી...ઘટમાળ !

આશાના સૂરજની લાલિમા આંખોમાં બળતી રહી,

સુખના સૌંદર્યની કલ્પના શમણે હું કરતી રહી...ઘટમાળ !

દિલના ઝરૂખે દીપ થૈ પ્રતિક્ષારત જલતી રહી,

જો આપ આવ્યા હોત તો ! વિચાર એ કરતી રહી...ઘટમાળ !

લઈને સુંવાળપ યાદોની ભ્રમણામાં રાચતી રહી,

સરી સૌંદર્યની લાલિમા જીવન ઘટમાળ ઘટતી રહી...ઘટમાળ !