લે મને
લે મને
1 min
13.8K
અજવાશનો શું અર્થ છે સમજાવ લે મને,
દીવાસળીની જેમ તું સળગાવ લે મને.
આ તારા શહેરમાં મળ્યું ભૂલા પડ્યાનું સુખ,
ભટકી ગયો છું નાં વધુ ભટકાવ લે મને.
આકંઠ ગુલમહોર પીને હોશમાં છું હું,
સાકી! આ રિક્ત જામ છે છલકાવ લે મને.
શું છે આ સૂર્ય તાપ તૃષા ઝાંઝવા ને છળ,
શું છે આ રણમાં દોડવું અટકાવ લે મને.
કોઈ સિતાર જેમ હું વાગી ઊઠીશ તરત,
ખાલી હવાનો હાથ પણ અફળાવ લે મને.
આ ખાલી ખાલી સાંજનો શું અર્થ છે કહે,
શું છે ઉદાસ થઇ જવું બતલાવ લે મને.
તારા શરીરનો જ એક હિસ્સો છુ હું હનીફ,
પહેરણની જેમ પણ હવે અપનાવ લે મને.