પરવરદિગાર રાખું છું

એનો દારોમદાર રાખું છું,

એક પરવરદિગાર રાખું છું.

આવશે એ ય પ્રતિબિંબની જેમ,

દર્પણોનાં હું દ્વાર રાખું છું.

દેહ પર એના પાનખર છે જો,

હું ય જાતી બહાર રાખું છું.

એક તારો વિચાર પ્રજ્વલિત,

સાંજ હો કે સવાર રાખું છું.

ગટગટાવું છું ઝાંઝવાઓ ‘હનીફ’,

હું તરસ પારાવર રાખું છું.

આ ઉપેક્ષાને બદલે પ્રેમ ‘હનીફ’,

હા, કરું છું સ્વીકાર, રાખું છું.

ઢળતી સાંજે ‘હનીફ’ એનું સ્મરણ,

લોહીમાં એકાકાર રાખું છું.