કેવું મજાનુ બાળપણ!
કેવું મજાનુ બાળપણ!
કલમમાંથી શબ્દ સ્ફૂરે, હૈયામાં ઉમંગ ઉભરે;
શૈશવની આશા કેરી સરિતા મુજમાં ઉછરે.
કેવું મજાનું બાળપણ !
મીઠી વાતો સંગ, અમે બાળપણને સાદે;
ચમનમાં છે રંગ, શૈશવની યાદે.
કેવું મજાનું બાળપણ !
આજ અરીસામાં જોતા થતું એવું;
બાળપણ મારું મળે તો, મજાનું કેવું !
કેવું મજાનું બાળપણ!
નૈન મારાં જોવાં તરસ્યા બાળપણની શરારત;
બદલાતા જીવનમાં યાદ છે, શૈશવની કરામત.
કેવું મજાનું બાળપણ !
સમંદરમાથી શબ્દ લાવી આંખોનાં ચમકારે;
પ્રકૃતિની ગોદમાં ઊછળતી, શૈશવના ઝબકારે.
કેવું મજાનું બાળપણ!
શૈશવના સંસ્મરણો મુજને કૈંક જુદાં ભાસતા;
મેઘધનુષના સપ્તરંગે અમે ચોમાસે ભીંજાતા.
કેવું મજાનું બાળપણ!
ગામનાં પાદરમાં, અમે ભેગાં મળી રમતાં;
દાદીની પરિવાર્તા, ચાંદામામાના સથવારે સાંભળતાં.
કેવું મજાનું બાળપણ !
દ્રશ્ય મુજને સૌમ્ય લાગતાં,જોઈ એ આકૃતિ;
અમૂલ મારું બાળપણ, એ છે જીવનની અનુપમ કૃતિ.
કેવું મજાનું બાળપણ !