હા તું એ જ છે
હા તું એ જ છે
આંખોમાં ડૂબાડે છે ને પાંપણે સજાવે છે,
મદમાતો દરિયો કે પછી છે તું ચિત્રકાર !
વરસે છે મેહુલિયા સમ ને તરસે પણ મારે છે,
ચોમાસુ થઈને આવે કે પછી કહું દુકાળ !
મહેંકે સમ રજનીગંધા કદી પ્રસ્વેદે પસારે છે,
ફોરમ તું ફૂલડાંની કે મહેનત છે અપાર !
વહેતી સરિતા વળી સરોવર સમ પણ ભાસે છે,
નિર્મળ અંતર કે પછી અટવાતો વિચાર !
વિયોગે તડપાવે છે ને મળવા પણ આવે છે,
છે તું પ્રિયતમા કે દિસતું ઝાંઝવા નીર !
હમણાં ધબકે ને પળવારમાં અચેત જણાય,
રુદિયું તું મુજનું કે આવી અંતની કગાર !
હવે ઓળખી, હા તું એ જ છે ઓ જિંદગી,
સૂરજ સમ ચમકે ને વળી ઓઢે અંધકાર !
આંખોમાં ડૂબાડે છે ને પાંપણે સજાવે છે,
મદમાતો દરિયો કે પછી છે તું ચિત્રકાર !