દીકરી

વળી ગઈ એક દીકરી પિતાના દ્વારેથી,  

આંખોમાં લઇ પાણી,

'જાવ છું' એટલુંય બોલી ન શકી એની વાણી,

આંખોમાં લઇ પાણી. 

યુવાનવયની મદમસ્ત એ રાજકુમારી,

બની ગઈ અજાણ્યા ઘરની રાણી 

આંખોમાં લઇ પાણી.

કેવી મુક્ત મને ઝૂમતી'તી ઘર આંગણમાં! 

જોને લજજાની સોડ એણે તાણી

આંખોમાં લઈ પાણી. 

છટાક-પટાક ફળિયું લઇ ફરતી જે માથે,

હવે હળવે -હળવે પડતી એના પગની પાની,

આંખોમાં લઇ પાણી.

કેટલાંય શ્વાસો વહ્યાં, વરસો જયાં વીત્યા, 

એ જ ઘરમાં બની હવે મહેમાન અજાણી

આંખોમાં લઇ પાણી.

નવા સંબંધો બંધાયા, સરનામાં બદલાયાં,

દીકરી, બહેન ને હવે બની ગઈ..વહુ રાણી,

આંખોમાં લઈ પાણી.