ભીંજાવું ગમશે તુજ નેહે

અષાઢી આમંત્રણ, ઉરથી આપું છું ઓ રે પ્રીતમજી !

હેલી થઈ ભીંજવને તન તુું, માંગુ છું ઓ રે પ્રીતમજી !

વ્હાલા વરસાદ બની વરસી જાજો, મૂકી અંતરનાં વાદો !

ભીંજાવું ગમશે તુજ નેહે, રાચું છું ઓ રે પ્રીતમજી !

મદભર મોસમ ખીલી છે વાલમ ! ભીના સ્પર્શો દે તું કાયમ,

પરદેશી થઈ ના પીડો તન, યાચું છું ઓ રે પ્રીતમજી !

અનરાધાર અહીં વરસે મેહુલો, લોચન રોતા રાતે પાણી,

તડપન ટાળ વિયોગીની બસ, ઝંખુ છું ઓ રે પ્રીતમજી !

સંદેશો દીધો મેં વાદળ સંગાથે; શાને ના વાંચ્યો ?

સમજો 'શ્રી' ના દિલની વાતો, ઈચ્છું છું ઓ રે પ્રીતમજી !