વાંસળી જેવો વગાડે

તું જગાડે, તું સુવાડે છે મને,

શ્વાસમાં કેવો રમાડે છે મને.

 

જાતથી કેવો સુધારે છે મને,

ને સમય પડતાં બગાડે છે મને.

 

યાદ એ રણછોડ રુપ આવે મને,

તું ખરી વેળા ભગાડે છે મને.

ભાન ભૂલીને સુખોને ભોગવું,

આગ થઇને તું દઝાડે છે મને.

 

કોઇનું ખોટું વિચારું કે કરું,

તે સમય પળમાં પછાડે છે મને.

 

લાભ છોડી મેં દુઆ સૌની કરી,

ખુશ થઈ છાતી લગાડે છે મને.

 

ધન્ય ત્યારે હું ઘણો એ થાઉ છું,

વાંસળી જેવો વગાડે છે મને.