આવું કેમ બનતું હશે ?
આવું કેમ બનતું હશે ?
આ સુગરીએ શું આર્કિટેકચરમાં કોઈ ડિગ્રી લીધી હશે ?
કેવી સુંદર માળાની ગૂંથણી કરવાનું એ ક્યાંય શીખી હશે ?
એણે આ તાલીમ ક્યાંથી લીધી હશે ?
શું આ કોયલે સંગીતમાં માસ્ટર કર્યું હશે ?
આવા સુંદર રાગ રાગિણીની,
એણે તાલીમ ક્યાંથી લીધી હશે ?
શું આ ઝરણું કોઈ સ્કૂલમાં ગયું હશે ?
આ ખળ ખળ વહેવાનું,
સદા ખુશ રહેવાની,
એણે તાલીમ ક્યાંથી લીધી હશે ?
આ ચાંદ સૂરજ કેવા નિયમિત છે !
જગતને આપે સદા પ્રકાશ,
આ નિયમિતતાના પાઠો ક્યાં શીખ્યા હશે ?
એણે આ તાલીમ ક્યાંથી લીધી હશે ?
આ બગીચાના બધા છોડ કેવા ડીસિપ્લીનમાં છે !
એક બીજા સાથે કેવા સંપીને રહે છે !
આ એકતાના પાઠ એણે કોણે શીખવ્યા હશે ?
એણે આ તાલીમ ક્યાંથી લીધી હશે ?
આ પહાડ કેવો મક્કમ છે !
આ વાવાઝોડું પણ એનું કંઈ બગાડી શકતું નથી.
આવું દ્રઢ મનોબળ રાખવાનું ક્યાંથી શીખ્યો હશે ?
એણે આ તાલીમ ક્યાંથી લીધી હશે ?
આ ધરતી કેવી સહનશીલ છે !
એણે ખોદનારને પણ મીઠું જળ આપે.
બીજ વાવનારને સો ગણુ પાછું આપે.
ધરતીએ આ નૈતિક મૂલ્યો ક્યાંથી મેળવ્યા હશે ?
એણે આ તાલીમ ક્યાંથી લીધી હશે ?
આ વસંત આવી ને ધરતીએ સોળે શણગાર સજ્યો.
લાલ લીલું ઘરચોળું.
અંબોડે ફૂલની વેણી.
માથે પહેર્યો ગુલાબનો તાજ.
કરે એ બાગે રાજ.
શું આ ધરતી એ કોઈ બ્યુટી પાર્લરનો કોર્સ કર્યો હશે ?
એણે આ તાલીમ ક્યાંથી લીધી હશે ?
મારું મન કરે કેટલાય સવાલ.
આ ફૂલોમાં રંગ કોણ ભરતું હશે ?
આ પતંગિયું પ્રકાશ માટે કેમ મરતું હશે ?
આ પ્રકૃતિને નિયમિત કોણ કરતું હશે ?
મારા આ અદ્રશ્ય મનમાં આટલા વિચારો કોણ ભરતું હશે ?
શું આ મન શરીર વગર ક્યાંય એકલું ફરતું હશે ?
આવું કેમ બનતું હશે ?