తగిన మూల్యం

ఒక్క నిమిషం చాలు

అపార్ధం ఆవహించడానికి

నిజాన్ని నిగ్గు తేల్చడానికి

బంధాలను కలపడానికి

బాధ్యతలను తుంచడానికి

మోహపు పొరలు కమ్మడానికి

మోసపు తెరలు కప్పడానికి

నిండు ప్రాణం నిలపడానికి

మెండు జీవితం నిలబెట్టడానికి

భవిష్యత్తు అంధకారం కావడానికి

విపత్తు వచ్చి ముంచడానికి

ప్రశాంత గోదారి ఉప్పెనల్లే మారడానికి 

గమ్యస్థానం అంచున చేజరడానికి

అందివచ్చిన అవకాశం

గుప్పిట ఇసుకల్లే చేజారడానికి

ఊపిరి గాలిలో కలవడానికి

అందుకే నిమిషమేనంటూ నిర్లక్ష్యం వద్దు

నిర్లక్ష్యానికి తప్పదు భారీ మూల్యం