నువ్వూ ఒక అనుభూతివి..
నువ్వూ ఒక అనుభూతివి..
అప్పుడే కొట్టిన టెంకాయలోని కొబ్బరికి బెల్లం కలిపి తిన్నట్టు
కొట్టిన మూడో రోజు దోసె పిండి పుల్లుంటలు వేసినట్టు
మా ఊరి సాయిబాబా గుడిలో పెట్టే పులిహోరలో ఇంగువ సువాసన వెదజల్లినట్టు
అత్తిరాస మీద ముద్దపప్పు పోసినట్లు
అలసంద వడలు నూనెలోంచి తీసినట్లు
పెళ్లి లడ్డు ఇచ్చినట్లు
తిరగవాతన్నం రెండో సారి అడిగి మరీ పెట్టినట్టు
వీరబల్లి బేనీషా జిగిరి మరీ ప్లేట్లో పెట్టినట్లు
మధ్యాహ్నం ఎండలో నన్నారి షర్బత్ తాగినట్లు
అల్ల నేరేడు పండ్లు మజ్జిగలో ఊరబెట్టినట్లు
కూర తక్కువొచ్చిన రోజు ఊరగాయ జాడీ దించినట్లు
పిండి బయట పడకుండా కజ్జికాయలు మడిచినట్లు
దోర జామకాయలు తోటలో చూసినట్లు
ఉలవ చారు చేసిన మర్నాడు తిన్నట్టు
సంగట్లోకి రోటి పచ్చడి దొరికినట్లు
రాములోరి పండగప్పుడు పానకం పోసినట్లు
భోగి రోజు దోసెలు పోటీగా తిన్నట్లు
అబ్బో ఎన్ని అనుభూతులు
ప్రతి రుచి వెనుకా కష్టాన్ని గుర్తించి
సంతోషాన్ని కాస్త కలిపినట్టు
నువ్వూ ఒక అనుభూతివి కావొచ్చు కదా
ఎప్పటికీ నా జ్ఞాపకాలతో ముడిపడిపోవచ్చు కదా
గమనిక : రచయిత "తిండిపోతు" అని మీరనుకోవచ్చు. కానీ..