ରାମ ଆସିଛନ୍ତି ରାଇଜକୁ ଫେରି
ଧାଡ଼ି ଧାଡ଼ି ଦୀପ ଜାଳ ,
ପ୍ରତି ଅଗଣାରେ ପୂର୍ଣ୍ଣକୁମ୍ଭ ରଖି
ଉତ୍ସବଟି ଆଜି ପାଳ ।
ଚଉଦ ବରଷ ବନେ ଯାଇଥିଲେ
ଧର୍ମ ସଂସ୍ଥାପନ ପାଇଁ ,
ସଙ୍ଗେ ଥିଲେ ତାଙ୍କ ସତୀ-ସୀତା ଆଉ
ଲକ୍ଷ୍ମଣ କୁମାର ଭାଇ ।
ବନୁ ବନ ଭ୍ରମି, କେତେ ଋଷି ମୁନି
କଲେ ,ଦେବ ଦରଶନ ,
ଆଶିଷ ତ ନେଲେ,କଲ୍ୟାଣ ବି କଲେ
ହୋଇ ସେ ଯେ ସୁ-ପ୍ରସନ୍ନ ।
ଦୁଷ୍ଟ ଦଳନର ଆଳେ,ସୀତା ସତୀ
ଅପହୃତା ହେଲେ ଛଳେ ,
ଠାବ କରି ହନୁ,ଲଙ୍କା ଦାହ କଲେ
ପରା ଅତି କଉଶଳେ ।
ସେତୁବନ୍ଧ ବାନ୍ଧି,ଶ୍ରୀ ପୁରୁଷୋତ୍ତମ
ନାଶିଲେ ଦଇତ କୁଳ ,
ଉଦ୍ଧରିଲେ ତହୁଁ ମହାସତୀଙ୍କୁ ସେ
କରି,କପି-ସେନା ଠୁଳ ।
ମହୀ ଭାରା ନାଶି,ସାଧୁ ଜନେ ତୋଷି
ବିଭୀଷଣେ ଦେଇ ରାଜ୍ୟ ,
ଭାଇ,ଭାର୍ଯ୍ୟା ଘେନି ଅଯୋଧ୍ୟାକୁ ପରା
ଫେରୁଛନ୍ତି ପ୍ରଭୁ ଆଜ ।
ସାରା ନଗରକୁ ସଜାଇ ଦିଅ ଲୋ,
ମଙ୍ଗଳ ସଙ୍ଗୀତ ଗାଅ ,
ରାମଙ୍କ ସ୍ୱାଗତ କରିବା ସକଳେ
ଦିବ୍ୟାନନ୍ଦେ ମାତି ଯାଅ ।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ।