ଦେଖାହେବେ ପାଶେ ଆସି
ଦେଖାହେବେ ପାଶେ ଆସି
ଆଜି ମନ ତା'ର ହରଷ ଅତି,
ମୁରୁଜ ପକାଏ ମଉନାବତୀ ।
ଭାଉଜଙ୍କ ଘରୁ ଆସିବେ ଜଣେ,
ଯାହାଙ୍କୁ ସେ ଭାରି ନିଜର ମଣେ ।
ତାଙ୍କ ଲାଗି ସଜ ଏତେ....
ଛଅ ତିଅଣକୁ ନଅ ଭଜା ଆଉ
ପିଠା,ମିଠା-କ୍ଷୀରି ଯେତେ ।
ହିସାବରେ ସିଏ ଭାଇଙ୍କ ଶଳା ,
ରଙ୍ଗଟି ତାଙ୍କର ଚିକ୍କଣ କଳା ।
ଭାରି ଶାନ୍ତଶିଷ୍ଟ ପିଲାଟି ସେହି ,
ପଢ଼ିଛନ୍ତି ପାଠ ସହରେ ରହି ।
ହୋଇଛନ୍ତି ଅଫିସର....
ପାଉଛନ୍ତି ମୋଟା ଅଙ୍କର ଦରମା
ଅଛି ତାଙ୍କ କୋଠାଘର ।
ଭାଉଜ ସେଦିନ କହିଲେ ଖୋଲି,
'ଘରଲୋକ ମନ-ମିନୁଠି ବୋଲି ।
ଭାଇର ଏସନ ଫିଟିଛି ପାଞ୍ଜି,
ବାହା ହେବାକୁ ସେ ହୋଇଛି ରାଜି ।
ମିନୁ ତ ଆମର 'ପରୀ'.....
ରୂପ,ଗୁଣ ଆଉ ପାଠଶାଠରେ ଯେ
ହେବେ ସିଏ ଭାଇ ସରି ।'
ଏତେ ଆୟୋଜନ ସେଇଥିପାଇଁ ,
ଘରଲୋକ ସବୁ ଅଛନ୍ତି ଚାହିଁ ।
ଚରଚାରେ ଯେହ୍ନେ ନ ହେବ ହେଳା,
କରିଛନ୍ତି ସବୁ ବ୍ୟବସ୍ଥା ପରା ।
ମଉନାବତୀ ବି ଖୁସି....
ଏତେଦିନ ପରେ ମନର ମଣିଷ
ଦେଖାହେବେ ପାଶେ ଆସି ।