લાગણીઓ ગોરંભાય છે

લાગણીઓ ગોરંભાય છે ને વાદળો વિખરાય છે.

લાગે છે કાંઈક થઈને જ રહેશે,આ હવા વરતાય છે.

પૂર્વવત એ જ ઈચ્છા ને સ્નેહ પ્રસરતો રહે છે વળી,

દૈવ થકી આ બંધન છે નિયત, કાંઈક એવું કળાય છે.

મનમાં વિકલ્પો છે ઘણા,પણ તમારી જ દરકાર છે,

પ્રથમ પ્રયાસમાં રચાયેલી અહીં તમારી જ સરકાર છે.

આજે અમી છાંટણા તો કાલે મુશળધાર હશે જ,

બારે મેઘ થશે ખાંગા એવી આગાહીઓ પરખાય છે.

મળી જશો આ જન્મે જ, એવા યોગ મલકી રહ્યા,

અંતર ઈચ્છા સામે બધા અંતરાયો લાચાર જણાય છે.

કહીશું એ પળો ને, કેવી રાહ જોયા કરી પામવાને,

આટલી આતુરતા થકી તો ભગવાન પણ પમાય છે !

હશે એ જ લખાણ વિધાતાના ગર્ભ કેરા હિસાબે,

એથી જ, ફરી ફરી એક આપની જ રાહ જોવાય છે.

લાગણીઓ ગોરંભાય છે ને વાદળો વિખરાય છે.

લાગે છે કાંઈક થઈને જ રહેશે,આ હવા વરતાય છે.