ଯୁଗଳ ମୂର୍ତ୍ତି

ଅଳି କରେ ରାଧା ଦୋଳି ଖେଳିବାକୁ

ଶିଆଳି ଲତାରେ ବସି

ଦୂରୁ ହସେ ଶ୍ୟାମ ବଂଇଶୀ ବଜାଇ

ରାଧା ଯାଏ ପୁଣି ରୁଷି ।

କର ନାହିଁ ମାନ ମାନୀନି ରାଧିକା

ବଂଶୀ ଡାକେ ତୁମ ନାମ

ନୟନେ ମୋହର ପଢିକି ପାରନା

ଭରି ରହିଅଛି ପ୍ରେମ ।

ଚଇତି ପବନ ଶିହରଣ ଭରେ

ଶାନ୍ତ ହୋଇଛି ଯମୁନା

କୋଇଲିର ଡାକ କର୍ଣ୍ଣ ଡେରି ଶୁଣ

ଆସେ ବଉଳ ବାସନା ।

ରଙ୍ଗେ ରଙ୍ଗାଇବି ଗୋରା ବଦନକୁ

ଚିହ୍ନି ନପାରିବେ କେହି

ମୋ ପ୍ରେମ ରଙ୍ଗରେ ରଙ୍ଗିଛ କେବେଠୁ

ଶ୍ୟାମା ପରିଚୟ ନେଇ ।

ଗୋଲାପି ନାଲିଆ ହଳଦୀ ନାରଙ୍ଗୀ

ଭଳି ଭଳି ଆଣି ରଙ୍ଗ

ପରବ ବାହାନା ତୁମେ କି ଜାଣନା

ଭିଜେଇବି ତୁମ ଅଙ୍ଗ ।

ଛାଡିବନି କେବେ ମୋର ପ୍ରେମ ରଙ୍ଗ

ପଡିବ ହୁରି ଗୋପରେ

ପାଦେ ପାଦ ଛନ୍ଦି ବସିବା ସାଥିରେ

ଝୁଲି ଶିଆଳି ଲତାରେ ।

ନାଚୁଥିବେ ଗୋପୀ କାହିଁ କେତେ ତପି

ଦରଶନ ଲାଳସାରେ

ଯୁଗେ ଯୁଗେ ଦୋଳି ସଜାଇ ଝୁଲାଇ

ଯୁଗଳ ମୂର୍ତ୍ତି ଦୋଳରେ ।