ତୁମେ କରୁଣା ସାଗର

ଅପଲକ ତୁମ ଚକାନୟନ

ଅଦ୍ଭୁତ କି ଆକର୍ଷଣ 

ରହିଛି କୁହୁକ କି ଯାଦୁ ମନ୍ତର

ଟାଣିନିଏ ସ୍ବତଃ ମନ ।

ସବୁରି ହୃଦୟେ କରୁଛ ନିବାସ

ତୁମେ ତ ବିଶ୍ବ ନିୟନ୍ତା

ବୁଝିପାର ତୁମେ ନ କହିଲେ ମଧ୍ଯ

ଭକତର ମନକଥା ।

ତୁମେ ସର୍ବବ୍ୟାପୀ ଅମୃତ ନିର୍ଯ୍ୟାସ 

କରୁଣାର ପାରାବାର

ଭାବ ଭକ୍ତି ପ୍ରେମ ତୁମେ ଜଗନ୍ନାଥ 

ଲୀଳା ତୁମ ସୁମଧୁର ।

ତୁମେ ଜୀବନର ଲକ୍ଷ୍ଯ ସର୍ବ ଶ୍ରେଷ୍ଠ 

ଧର୍ମ ଅର୍ଥ କାମ ମୋକ୍ଷ 

ଲଗାଅ କୂଳରେ ହେ ଭବ ନାଉରୀ

ଅସହାୟ ମୁଁ ଅରକ୍ଷ ।

ବଡଦାଣ୍ଡ ଧୂଳି ମୁଣ୍ଡରେ ମୁଁ ବୋଳି

ମଣୁଛି ଜୀବନ ଧନ୍ଯ 

ଦେଖି ରଥଯାତ ଆତ୍ମା ମୋ ସଂତୃପ୍ତ

ଆଶା ମୋର ପୂର୍ଣ୍ଣକାମ ।

ବିରାଜ ପ୍ରଭୁ ହେ ଶ୍ରୀନୀଳକନ୍ଦରେ

ହୃଦ ରତ୍ନ ସିଂହାସନେ

ମଧୁପ ମୋ ମନ ରହୁ ସଦା ଲାଖି

ଅଭୟ ଶ୍ରୀ ପାଦପଦ୍ମେ ।