ରହସ୍ଯମୟ

ମାଆର ଉଦରେ ସନ୍ତାନ ଟି ବଢେ

ପେଟରେ ସେ ଯାହା ଖାଏ।

ରହସ୍ଯ ର କଥା ମାଆ ଯାହା ଖାଏ

ସନ୍ତାନ ସେଥିରୁ ପାଏ ।୧।

ଜନମ ଲଭିଲେ ଖାଇବ ଶିଶୁଟି

ଜନମଦାତା ଜାଣନ୍ତି ।

ମାଆର ସ୍ତନରେ ଆଗରୁ ସେ କ୍ଷୀର

ସାଇତି ରଖି ଥାଆନ୍ତି ।୨।

ସକାଳୁ ସୂରୁଜ ସବୁଦିନ ଉଇଁ

ସଞ୍ଜ ହେଲେ ଅସ୍ତ ଯାଏ ।

ଗ୍ରହ ଚନ୍ଦ୍ର ତାରା ନଭ ମଣ୍ଡଳ ରେ

କି ସୁନ୍ଦର ଘୁରୁଥାଏ  ।୩।

ଦିନ ମାସ ଋତୁ ବର୍ଷ କାଳ

ସବୁ ଚକ୍ରବତ ଘୁରୁଥାଏ ।

କାହାର ଭୟରେ ପବନ ବହଇ

ମେଘ ବରଷା କରାଏ ।୪।

ସ୍ବେଦଜ, ଉଦ୍ଭିଦଜ ,ଅଣ୍ଡଜ ଆବର

ଜରାୟୁଜ ଜାତ ହୋଇ ।

ଏ ଧରା ଧାମ ରେ ଆତଯାତ ହୋଇ

ଜୀବନେ ଅଛନ୍ତି ରହି ।୫।

ସୁଖ ଦୁଃଖ ଘାତ ସଂଘାତ

ଆଦର ଅନାଦର ଭଲ ମନ୍ଦ ।

ଆସେ ଜୀବନରେ କେବେ କେତେବେଳେ

ମାନବ ଲଭେ ଆନନ୍ଦ ।୬।

ସବୁ ତ ରହସ୍ଯ ଭାବିଲେ ନସରେ

ଅନ୍ତ କି ମିଳିବ ତାର ?

ରହସ୍ଯମୟ ଏ ଜୀବନ ଆମର

ଧନ୍ୟ ତାର କାରିଗର ।୭।