ପ୍ରିୟା ତୁ...

ବସନ୍ତ ଋତୁର 

   କୋଇଲି କୁହୁକ ତୁ 

    ରୂପ ତୋ ମେଘ ଅସରା... 

ପାହାଡ ଛାତିର 

    ଚଗଲି ଝରଣା ତୁ 

      ଛନ୍ଦ ତୋ ପୁରା ନିଆରା... 

ବେସୁରା ବୀଣାର 

   ସୁରିଲା ରାଗିଣୀ ତୁ 

      ନିଦ ତୋ କଅଁଳ ଖରା... 

ଅଦିନ ବର୍ଷାର 

   ମାଟିର ବାସନା ତୁ 

     ହସ ତୋ ଦାମୀକା ହୀରା... 

ପ୍ରେମ ପୁସ୍ତକର 

   ନ ଥିବା କାହାଣୀ ତୁ 

     ଭାବ ତୋ ହୃଦୟ ଥରା... 

ମଧୁ ବସନ୍ତର 

  ଫୁଲେଇ ଗହଣା ତୁ 

    ଆଖି ତୋ ଶ୍ରାବଣ ଧାରା... 

ଶୀତ ସକାଳର 

  ରୂପେଲି କାକର ତୁ 

     ମନ ତୋ ଜଳ ଫୁଆରା...

ମେଘ ମଲ୍ଲାରର 

   ଅଜଣା ପୁଲକ ତୁ 

      ବାଟ ତୋ ପୁରା ଅଫେରା...

ସାଗର ବୁକୁର

   ସୁନ୍ଦରୀ ଶାମୁକା ତୁ 

      କଥା ତୋ ଚମକ ଭରା... 

ଜହ୍ନ ରାଇଜର 

   ସଫେଦ ଜୋଛନା ତୁ 

     ଠାଣି ତୋ ପ୍ରେମ ମନ୍ତୁରା...