ନାଆଁଟି ମୋହର ଛତା

ଛତା ବୋଲି ମୋର ନାମ ଅଟଇ

ଖରା ବର୍ଷାରେ ମୁଁ ଖୋଜା ପଡ଼ଇ l

କଳା ଧଳା, ନାଲି କେତେ ରଙ୍ଗରେ

ଶରୀର ମୋହର ଶୋଭା ପାଏରେ l

ଅର୍ଦ୍ଧଚନ୍ଦ୍ର ବେଣ୍ଟ ପାଦେ ମୋ ଥାଏ

ଛୋଟ ଟୋପିଟିଏ ମଥାରେ ଶୁଏ l

ମେରୁଦଣ୍ଡ ମୋର ଲୁହାର ବାଡ଼ି

ଛାତିର ପିଞ୍ଜରା ଅଟଇ ଖାଡ଼ି l

କେବେ ରୁହେ ମୁହିଁ ମୁଣ୍ଡ ଉପରେ

ଆଉ କେବେ ପୁଣି କାଖ ତଳରେ l

ଝାଞ୍ଜି ଖରା ଅବା ଝଡ଼ି ବରଷା

କରିଥାନ୍ତି ମୋତେ ଲୋକେ ଭରଷା l

ଧନୀ ଠୁ ଗରିବ ସବୁରି ପ୍ରିୟ

ବିପଦ ଆପଦେ ସଦା ମୋ ଲୟ l

ପ୍ରାଣ ଥିବା ଯାଏଁ ରୁହେ ମୁଁ ସାଥେ

ଯେତେ ଝଡ଼ ଝଞ୍ଜା ଆସୁ ମୋ ପଥେ l

ନ ମିଳୁ ପଛକେ ମୋତେ ସମ୍ମାନ

ପର ପାଇଁ ଦିଏ ମୁହିଁ ଜୀବନ l

ଛତାଟିଏ ଭାଇ ମୁଁ ଛତାଟିଏ

ସଭିଙ୍କ ହିତରେ ପା' ଲୋଡ଼ା ହୁଏ l