ବଣରେ ପଡ଼ିଛି ହୁରି

ଜାନୁଆରୀ ଛବିଶି ଆସିଛି ବୋଲି

ବଣରେ ପଡ଼ିଛି ହୁରି

ବିଲୁଆ ନନାଟା ଚିଲେଇ କହୁଛି

କରିବା ପ୍ରଭାତ ଫେରି l

ବଡି ସକାଳରୁ ସଭିଏଁ ଉଠିବା

ଅସରନ୍ତି ଖୁସି ନେଇ

ଗରବେ ପାଳିବା ଏ ଜାତୀୟ ପର୍ବ

ଏକ ସ୍ଥାନେ ରୁଣ୍ଡ ହୋଇ l

ତ୍ରିରଙ୍ଗା ପତାକା ଉଡ଼ାଇବା ଆମେ

ଦେଶପ୍ରେମ ରଙ୍ଗ ବୋଳି

ନେବାରେ ଶପଥ ଏ ବଣ ମୁଲକେ

କ୍ରାନ୍ତିର ମଶାଲ ଜାଳି l

ଗଧିଆ ଭାଇନା ବଜାଇବ ବାଜା

ଚଉଦିଗ ଚମକାଇ

ମାଙ୍କଡ଼ ମଉସା ପୁଙ୍କିବି ପେଁ କାଳି

ଦଳବଳ ସାଥେ ନେଇ  l

ହଳଦୀ ବସନ୍ତ ଠେକୁଆ ହରିଣ

କୋଇଲି କଜଳ ପାତି

ସରାଗେ ଗାଇବେ ଜନ ଗଣ ମନ

ହୃଦେ ଭରି ଦେଶପ୍ରୀତି  l

ସଭାପତି ରୂପେ ସିଂହକୁ ବାଛିବା

ଗରବେ ଫୁଲାଇ ଛାତି

ବାଘ, ଭାଲୁ, ହାତୀ ଦେବେଟି ଭାଷଣ

ଶୁଣିବା ପୁରାଇ ମତି  l

ରାଗ ହିଂସା ଭୁଲି ମିଶି କି' ଚଳିବା

ରଖି ଠିକ୍ ବୁଝାବଣା

ହିଂସାକୁ ଆଡ଼େଇ ସୁପଥେ ଚାଲିବା 

ହେବାନାହିଁ ବାଟବଣା  l

ବିଲୁଆର କଥା ମନକୁ ପାଇଲା

ସବୁ ହେଲେ ଏକମତ

ବଣର ରାଜାଙ୍କୁ ବୁଝାଇ କହିଲେ

ସସମ୍ମାନେ ଯୋଡ଼ି ହାତ  ll