ଫଳ ନେ ଦେଉଛି ଖାଆ

କେତେ ଦିନରୁ ତୁ ବନ୍ଦୀ ଅଛୁ ଏଠି

ଏମିତି ପଞ୍ଜୁରୀ ମଧ୍ୟେ,

ମୁଁ ପାରୁଛି ତୋର ବେଦନାକୁ ବୁଝି

ବାଣ୍ଟିଦେ ସେଥିରୁ ଅଧେ ।

ମୁକ୍ତ ଆକାଶର ପକ୍ଷୀ ଭଳି ଦିନେ

ମୁଁ ବି ଉଡ଼ି ବୁଲୁଥିଲି,

କଟକଣା ତିଳେ ନ ଥିଲା ଜମାରୁ

ପଢ଼ି ଖେଳି ବଡ ହେଲି ।

ରୂପ ଗୁଣର ମୋ ଚର୍ଚ୍ଚା ଶୁଣି କେତେ

ମିଳିଲେ ଆଶାୟୀ ପାତ୍ର,

ବାପ ଘର ଗେଲବସର ସରିଲା

ହାତକୁ ହେଲି ଦି' ହାତ ।

ଦୁହିତାଟି ଦୁଇ କୁଳ ହିତ ଲାଗି

ଏଠି କିନ୍ତୁ କଥା ଭିନ୍ନ,

ନୂଆ ପରିବାରେ ଅନ୍ୟ ଚିନ୍ତାଧାରା

ପୂର୍ବ ପରିଚୟ ଗୌଣ ।

ନାହିଁ ଜମା ସ୍ଵାଧୀନତା ବୋଲି କିଛି

ବୋହୂ ଚାବି ଦିଆ ଯନ୍ତ୍ର,

ପ୍ରତିବାଦ ଆଉ ପ୍ରତିରୋଧ ମନା

ଜାଣନ୍ତି ଯେସନେ ମନ୍ତ୍ର ।

ଧୈର୍ଯ୍ୟ ହରା ନୋହି କର୍ତ୍ତବ୍ୟ କରୁଛି

ତଥାପି ରଖିଛି ଆଶା,

ହୃଦୟ ଜିତିକି ବଦଳେଇ ଦେବି

ଯାହା ପ୍ରତିକୂଳ ଦଶା ।

ମନ ଊଣା ତୁହି କରନାରେ ପକ୍ଷୀ

ଫଳ ନେ ଦେଉଛି ଖାଆ,

ପଞ୍ଜୁରୀ ଦୁଆର ଖୋଲିଦେଲି ଏବେ

ମୁକ୍ତ ହୋଇ ଉଡ଼ି ଯାଆ ।