କରୁଥାଅ ନିତି ଗେଲ
କରୁଥାଅ ନିତି ଗେଲ
କୁନି ଭଉଣୀ ମୋ ହାତ ଗୋଡ଼ ଛାଟି
ଖେଳୁଅଛି ଦେଖ ଜେଜେ ,
ଚାହୁଁଅଛି ଖାଲି ମିଟି ମିଟି କରି
ହାତକୁ ଚୁଚୁମି ନିଜେ ।
ଲହୁଣୀ ମଖା ତା' ଚେହେରା ସାଙ୍ଗକୁ
କୁନି କୁନି ହାତ ପାଦ ,
ଯୋଉଠି ଥିଲେ ବି ଧାଇଁ ଆସେ ମାଆ
ଶୁଣିଲେ ତାହାର କାନ୍ଦ ।
ପାଖେ ପାଖେ ତା'ର ରହିବାପାଇଁକି
ଲାଗେ ମୋତେ ଭାରି ଭଲ ,
ବେଳେବେଳେ ମୁହିଁ ଶରଧାରେ ଯାଇ
କରିଦିଏ ତାକୁ ଗେଲ ।
ଯେଉଁଦିନ ସିଏ ଜନମ ହୋଇଲା
ତୁମେ କଲ ମନଦୁଃଖ ,
ଜେଜେମା କହିଲା-ମୋ ବେଳକୁ ମିଠା
ବାଣ୍ଟୁଥିଲ ଗାଆଁ ଯାକ ।
ମୋତେ ପାଇ ଯଦି ଏତେ ଖୁସି ଥିଲ
'ଲୋରୀ' ପାଇଁ କିଆଁ ନାହିଁ ,
ଆମ ଦୁହିଁଙ୍କର ଜେଜେ ପରା ତୁମେ
ଅଲଗା ଭାବୁଛ କାହିଁ !!
ବାପା କହୁଥିଲେ ଭଉଣୀକୁ ମୋର
କୋଟିକେ କରିବେ ଜଣେ ,
କୋଉଥିରେ ତାକୁ ଊଣା କରିବେନି
ରଖିବେନି ଘର କୋଣେ ।
ପାଠ ଶାଠ ସହ ଖେଳ ନାଚ ଗୀତ
ସବୁ ଶିଖାଇବେ ତାକୁ ,
ଇଚ୍ଛା କଲେ ସିଏ ବିମାନ ଉଡ଼ାଇ
ବୁଲାଇବ ବାପା ମା'ଙ୍କୁ ।
ତୁମକୁ ବି ସିଏ ସାଥେ ନେବ ଜେଜେ
ପାଇବ ବହୁତ ଭଲ ,
ଆଜିଠାରୁ ତାକୁ ମାଆ କୋଳୁ ଆଣି
କରୁଥାଅ ନିତି ଗେଲ ।