ନୂଆ ବର୍ଷ...
ନୂଆ ବର୍ଷ...
ଦିନ ପରେ ଦିନ, ମାସ ପରେ ମାସ
ଗଡି ଗଡି ଚାଲେ, ପୂରିଯାଏ ଏକ ବର୍ଷ,
ହୋଇଯାଏ ସିଏ ପୁରୁଣା, ରହି ଯାଏ ଅତୀତରେ
ବାଟ ଛାଡିଦିଏ ସିଏ ଦେଖି ନୂଆ ବର୍ଷ |
ନୂଆ ବର୍ଷର ଆଗମନ ଦେଖି ମନ କହେ
ସ୍ୱାଗତ କରିବ ତାକୁ ସିଏ ବଡ଼ ଆଦରରେ,
ଦେଖିବ ନୂଆ ନୂଆ ସ୍ବପ୍ନ ବଡ଼ ଆନନ୍ଦରେ
ବାନ୍ଧେ ଭରସାର ଡୋର ସିଏ ବଡ଼ ଆଶାରେ |
ବିବ୍ରତ ଥିଲା ପାଇ କେତେ ଯନ୍ତ୍ରଣାର ଯାତନା
ଭାଙ୍ଗିଥିଲା ତାର ଆଶା ଆଉ ଭରସାର ବାସ,
ସମୟର ସଙ୍ଗେ ମିଶି ବଡ଼ ଖେଳ କରିଗଲା
ଗତ ବର୍ଷ ଦୁନିଆରେ, ଜାଣିଛି ନୂଆ ବର୍ଷ |
ସେଥିପାଇଁ ସବୁ ଏବେ କରନ୍ତି ସୁନ୍ଦର ଆୟୋଜନ
ନୂଆ ବର୍ଷରେ ଜଣାଇବେ ମିଶି ଶୁଭ ଅଭିନନ୍ଦନ,
ଜକମକ ହୋଇ ସାଜସଜ୍ଜାରେ ସାଜିଛି ମଧ୍ୟ ରାତ୍ରି
କରିବାକୁ ବଡ଼ ସରାଗରେ ତାକୁ କରିବ ଆଲିଙ୍ଗନ |
ବାଜୁଛି ବାଜା, କମ୍ପୁଛି ସଙ୍ଗୀତର ଧ୍ୱନି ଚଉଦିଗେ
ଆତସବାଜୀରେ ରାତ୍ରୀ ବି ହସି ହସି ଚାହିଁଛି,
ଏହି ନୂଆ ବର୍ଷକୁ, ରହିଛନ୍ତି ସବୁ ଅପେକ୍ଷାରେ
ପାଦ ଚାପି ଚାପି ପରା ସିଏ ଆସୁଛି |
ଅତୀତକୁ ଭୁଲି କେତେ କେତେ ଆଶା ନେଇ
ନୂଆ ବର୍ଷକୁ ଧରି ରଖନ୍ତି ସଭିଏଁ ପରା,
ନାଚି ନାଚି, ଝୁମି ଝୁମି ବଡ଼ ଉଲ୍ଲାସରେ
ଖେଳିଯାଏ ଖୁସିର ଲହଡି ଏହି ଜଗତ ସାରା |
ତୁନି ତୁନି ତାକୁ ଏକାନ୍ତରେ ବସି ଏବେ
କୁହନ୍ତି ସବୁ ଯାହା ଯନ୍ତ୍ରଣା ଯାତନା ପାଇଛନ୍ତି,
ନୂଆ ବର୍ଷ ସିଏ, ସବୁ ଶୁଣିଯାଏ ଆଦରେ
ବୁଝିଯାଏ ସବୁ, କେତେ ଆଶା ମନରେ ବାନ୍ଧିଛନ୍ତି |
ସବୁ ଦେଖି ସବୁ ବୁଝି ନୂଆ ବର୍ଷ
ଚୁପ ହୋଉ ସବୁ ବିଚାରେ, କିଛି କହେନାହିଁ,
ସମୟକୁ ଚାହେଁ ଆଉ ଆଖିଠାର ଖାଲି ମାରେ
କେବେ କାହାର ଆଶାର ପ୍ରଦୀପ ଲିଭେ ନାହିଁ ।