କିଛି ସ୍ମୃତି ,କିଛି ପ୍ରଶ୍ନ
କିଛି ସ୍ମୃତି ,କିଛି ପ୍ରଶ୍ନ
ହସ ଲାଗେ, ବଡ଼ ଦୁଃଖ ବି ଲାଗେ,
ଯେବେ ଆଖି ବୁଜି ମୁଁ ଭାବନାରେ ଡୁବେ,
ଅମାନିଆ ଲୁହ କାହିଁକି କେଜାଣି ବହିବାରେ ଲାଗେ,
ମୋର ନୀରବତା ମୋତେ ପ୍ରଶ୍ନ କରିବାରେ ଲାଗେ ।
ଏହି ନୀରବତା ମୋତେ ସ୍ମୃତିରେ ହଜାଇ ଦିଏ,
ମୋର ଏକାନ୍ତତାକୁ ସିଏ ସାଥୀ କରିନିଏ,
ନିଜକୁ ଚିନ୍ତନରେ ହଜାଇ ଟିକେ ଆନନ୍ଦ ପାଏ,
ଯେବେ ନିଜକୁ ଅତୀତ ସହ ପରିଚିତ କରାଏ ।
ଅତୀତ ମୋତେ ଦେଖି କିଛି ପ୍ରଶ୍ନ କରେ,
ମୋତେ ଚିହ୍ନିବାକୁ ଚାହେଁ ସିଏ ମୋର ଉତ୍ତରରେ,
ଆଉ ମୁଁ ଖୋଜେ ନିଜକୁ ସମୟଚକ୍ର ଭିତରେ,
ଉତ୍ତର ଦେବାକୁ ସ୍ମୃତି ମୋତେ ସାହାଯ୍ୟ କରେ ।
କାହିଁକି କେଜାଣି ଏମିତି ସବୁ କିଛି ହୋଇଗଲା,
ସମୟ ତ ମୋତେ ଆଖି ଠାର ମାରିଥିଲା,
କିନ୍ତୁ କିଛି ସ୍ବପ୍ନ ମୋତେ ଅଧୀର କଲା,
ଆଉ ମୋତେ କିଛି କଥା ଭୁଲାଇ ଦେଲା ।
କିନ୍ତୁ ସ୍ମୃତି ମୋର ସବୁ ସାଇତି ରଖିଛି,
ଏବେ ମୋତେ ସିଏ ହସି ହସି କହୁଛି,
ପ୍ରଥମ ପ୍ରେମର ମିଠା ମିଠା କ୍ଷଣକୁ ଦେଖାଉଛି,
ଆଉ ମୋର ଉଦାସ ମନକୁ ପ୍ରଶ୍ନ କରୁଛି ।
ଏବେ ମୋର ହୃଦୟ ମୋତେ ପୁଣି କହୁଛି,
ପ୍ରଥମ ପ୍ରେମର ପରସକୁ ସିଏ ସାଇତି ରଖିଛି,
ବିରହ ବେଦନାରେ ନିତି କାନ୍ଦି କାନ୍ଦି ମରୁଛି,
ଆଉ ଲୁହ ହୋଇ ଆଖିରୁ ଝରି ଯାଉଛି ।
ସଭିଙ୍କର ପ୍ରଶ୍ନ ମୋତେ ବଡ଼ ବିବ୍ରତ କରେ,
ନିଜକୁ ନିଜେ ମୁଁ ଆଜି ପ୍ରଶ୍ନ କରେ,
କାହିଁକି ପଡ଼ିଥିଲି ଅବା ମୁଁ ପ୍ରେମ ଜାଲରେ,
ସେହି ଅଧୁରା ପ୍ରେମ ଆଜି କନ୍ଦାଇ ମାରେ ।
କେମିତି କେଜାଣି ପ୍ରେମର ବନ୍ଧନ ଛିଣ୍ଡିଗଲା,
ମିଠା ମିଠା ସ୍ବପ୍ନ ସବୁ ମୋର ଭାଙ୍ଗିଗଲା,
ସମୟ ସିନା ମୋତେ ସବୁ ଭୁଲାଇ ଦେଇଥିଲା,
କିନ୍ତୁ ସ୍ମୃତି ଏବେ ହୃଦୟକୁ ଜାଗ୍ରତ କଲା ।