ମା' ପରି ହେବ କିଏ

ମାଆ ଶବଦରେ ଅଛି ସ୍ନେହ ଭାବ

କରୁଣା ର ସେ ପ୍ରତୀକ,

ମାଆ ଶବଦଟି ବ୍ୟୋମଠୁ ବ୍ୟାପକ 

ମାଟି ଠୁ ନିବିଡ଼ ଅଧିକ । (୧)

ମାଆ ର ମମତା ଠାରୁ କିଛି ବଡ଼ 

ଦୁନିଆରେ ଆଉ ନାହିଁ,

ମାଆ ର ଶରଧା ସରାଗ ସନେହ 

ଆଉ ବା ମିଳିବ କାହିଁ । (୨)

ମାଆ ଡ଼ାକ ଖାଲି ଅନୁଭବି ପାରୁ 

ସିଏ ତ ଅବର୍ଣ୍ଣନୀୟ,

ଆଦି ଅନ୍ତ ସବୁ ମା' ଠାରୁ ହୁଏ 

ସଂସାରେ ସେ ଅଦ୍ୱିତୀୟ । (୩)

ଛୁଆ ର ମୁହଁ ରୁ ମାଆ ଡ଼ାକ ଶୁଣି 

ଭୁଲିଯାଏ ସବୁକିଛି,

ଅସହ୍ୟ ଗରଭ ବେଦନାକୁ ସହି 

ସଂସାରକୁ ସେ ଜିଣିଛି । (୪)

ଭୋକିଲା ଛୁଆର ପେଟ ଚିହ୍ନି ମାଆ 

ଖାଇବାକୁ ବାଢ଼ିଦିଏ, 

ଲାଳସା ନ ଥାଏ ପ୍ରତିଦାନେ ତା'ର 

ମାଆ ପରି ହେବ କିଏ । (୫)

ଦେହ ଖରାପରେ ମୁଣ୍ଡ ପାଖେ ବସେ 

ରାତି ରହେ ଉଜାଗରେ,

ନିଜ ପଣତରେ ବିଞ୍ଚି ଦିଏ ମାଆ 

ଅଶ୍ରୁପୂର୍ଣ୍ଣ ଭାବ ଭରେ । (୬)

ମାଆ ର କୋଳରେ ମୁଣ୍ଡ ରଖିଦେଲେ 

ନିଦ୍ରା ଦେବୀ ଆସେ ଧାଇଁ, 

ସର୍ବସ୍ବ ତ୍ୟାଗେ ସେ ଛୁଆ ମୁହେଁ ଟିକେ 

ହସ ଫୁଟାଇବା ପାଇଁ । (୭)

ଅମୃତମୟୀ ସେ ମମତାର ଦେବୀ 

ସର୍ବଂସହା ରୂପେ ଜଣା, 

ତା' ତ୍ୟାଗ ମମତା ବଳିଦାନ ପାଇଁ 

ବିଶ୍ଵମାତା ରେ ସେ ଗଣା । (୮)