Library
Profile
ଆସନ୍ତା କାଲି
ଆସନ୍ତା କାଲି
ଗତକାଲି ଆମେ ସକଳେ ଦେଖିଲେ
ଆଜି ବର୍ତ୍ତମାନ ଦୃଶ୍ୟ
ଆସନ୍ତା କାଲିତ ସବୁରି ପାଇଁକି
ଅଟେ ଅସ୍ଥିର ଅଦୃଶ୍ୟ ।
ଏଇତ ଜୀବନ ଦର୍ଶନ ପ୍ରମାଣ
ବିଚାର ସର୍ବେ ସୁଚିତ୍ତେ
ଭାବି ଅତୀତକୁ ଗଢ଼ିବ ଆଜିକୁ
ଭବିତବ୍ୟ ସୁଖ ହିତେ ।
ଅତୀତ ନଝୁରି ଶିକ୍ଷା ଲାଭ କରି
ଠୁଳ କର ଅଭିଜ୍ଞତା
କାଳ ଶ୍ରେଷ୍ଠ ବର୍ତ୍ତମାନେ ଲୟରଖି
ଦେଖା କର୍ମ ତତ୍ପରତା ।
ଆଜିର ସମୟ ମହାମୂଲ୍ୟବାନ
ଅର୍ଘ୍ୟ ଧରି ସମାସିନ
ଅବହେଳା କଲେ ଅତୀତ ଗର୍ଭରେ
ହୋଇଯିବ ସେ ବିଲୀନ ।
ତେଣୁ ବିଜ୍ଞ ଜନେ
ଆଜିର ଦିନକୁ
ଦିଅନ୍ତି ସଦା ପ୍ରାଧାନ୍ୟ
ଭବିଷ୍ୟତ ସଦା ଅଜ୍ଞାତ ଅନ୍ଧାର
ନପାଏ ସ୍ଥିରତା ମାନ୍ୟ ।
ଆସନ୍ତା କାଲିକୁ ଥିବ କି ନଥିବ
କିବା ପଡ଼ିବ ପ୍ରମାଦ
ଏହା ହେତୁକରି ଯାଅ କାମକରି
ଏହା ସତ୍ୟ ନିର୍ବିବାଦ ।
ଜୀବନ ଯୌବନ ଧନ ନୁହେଁ ଚିର
ଆସନ୍ତା ହିଁ ଅନିଶ୍ଚିତ
କେ ଜାଣେ କାହାର ମୃତ୍ୟୁକାଳ ଆସି
ନହୋଇବ ଉପସ୍ଥିତ ।
ସମୟର ମୂଲ୍ୟ ଅଟଇ ଅମୂଲ୍ୟ
ଆଜକୁ ରଖନ୍ତୁ ଧ୍ୟାନ
ଆସନ୍ତାକାଲିକୁ ବାକିଆ କାମକୁ
ରଖନାହିଁ ବୁଦ୍ଧିମାନ ।
