ଜୟ ଯବାନ୍ ଜୟ କିଷାନ୍

ଭାବ୍'ଲେ ଆଏଜ୍ ଦୁଃଖ୍ ଲାଗୁଅଛେ

ଆମର୍ ଇ ଦେଶର୍ କଥା,

ହୀନ୍ ରାଜ୍'ନୀତି ଦେଖିକରି ଲାଜେ

ଲୁଇଁ ଯାଉଛେ ମୋର୍ ମଥା ।

କହେଲେ କହେବା କହୁଛେ,

"ଜୟ ଯବାନ୍ ଜୟ କିଷାନ୍" ନାଁ ଥି

ଚୁଛାଟାରେ ହାୱା ବହୁଛେ ।

ଆମର୍ ଦେଶର୍ ଚଷା ଭାଈ ମାନେ

ବିକ୍'ଲେ ଯାଉଛନ୍ ମରି,

ବେଂକୁ ନେଉଥିଲା ଲାଗର୍ ଭାର୍ କେ

ନାଇଁ ଶୁଝି ପାରି କରି ।

ସରକାର୍ ସବ୍ ଦେଖୁଛେ,

ସେଁର୍'ରିଆ ମୁହେଁ ଚାଷୀ ମୃତ୍ୟୁ ହାର୍

କାଗଜ୍ କଲ୍'ମେ ଲେଖୁଛେ ।

ଯବାନ୍ ଭାଈ ଇ ଦେଶର୍ ସୀମା ଥି

ଦିନ୍ ରାଏତ୍ ଲଢୁଛନ୍,

ନେତା ତାକର୍ କାନ୍ଧେ ବନ୍ଧୁକ୍ ରଖି

ଆମର୍ ଦେଶ୍ ଗଢୁଛନ୍ ।

ଯବାନ୍ ଆମର୍ ମଲେନ,

ରକ୍ଷକ୍ ନାଁ ଥି ଭକ୍ଷକ୍ ସାଜି ନେତା

ଦେଶ୍ କେ ଖୁଂଖ୍'ଡ଼ା କଲେନ ।

"ଜୟ ଯବାନ୍ ଜୟ କିଷାନ୍" ନାରା

ଦେଉଥିଲେ କାଣା ହେବା ??

ଅନ୍ନଦାତା କିମ୍ବା ପ୍ରାଣଦାତା ଯଦି

ଅକାରଣେ ଜୀବନ୍ ଦେବା ।

ଦିନେର୍ ଲାଗି କଲେ ସୁର୍,

ହେତୁ ରଖ୍ ଦେଶ୍ ବିକାଶର୍ ପଥୁ

କେଥ୍'ନି କେତେ ଅଛେ ଦୂର୍ ।