ଆମ ନୂଆଖାଇ

ନୂଆ ଧାନେ ନୂଆଖାଇ ଆମ ଏଇ 

ପରମ୍ପରାଗତ ପରବ,

ଆମର ସଂସ୍କୃତି ଆମ ଐତିହ୍ୟ ଏ 

ପଶ୍ଚିମାଞ୍ଚଳର ଗରବ । (୧)

ଚଷା ପୁଅ ପାଳେ ଏହି ପରବକୁ

ଧାନ ଅମଳର ଖୁସିରେ,

ବିଜୁବାବୁ ଏହି ଦିନକୁ ଘୋଷିଲେ

ଆମ ସରକାରୀ ଛୁଟିରେ । (୨)

ପାଳିତ ହୁଅଇ ଭାଦ୍ରବ ମାସର

ଶୁକ୍ଳ ପଞ୍ଚମୀ ତିଥିରେ,

ଘରେ ହସଖୁସି ଆନନ୍ଦ ଉଲ୍ଲାସେ 

ଦିନ ଯାଏ ସୁଖେ ବିତିରେ । (୩)

ବରଷା ଋତୁର ଶେଷେ ଶରତରେ

ଧରା ପୃଷ୍ଠେ ଆଗମନ,

ଏହି ସମୟରେ ଚଷା ଭାଈ ଆମ

କରେ ଚାଷ ବେଉଷଣ । (୪)

ଇଷ୍ଟଦେବୀ ଆମ ପୂଜା ପାଇଥାଏ 

ଆଜି ଏ ଶୁଭ ଲଗନେ,

ଭକ୍ତ ନୂଆ ଧାନ ସମର୍ପଣ କରେ 

ଭକତି ଭାବ ମଗନେ । (୫)

ଆରାଧ୍ୟଙ୍କ ପାଖେ ନୂଆ ଧାନୁ ଚୂଡ଼ା,

ଭାତ, କ୍ଷୀରି ହୁଏ ଅର୍ପଣ,

ଷାଠିଆ ଧାନରୁ ପ୍ରସ୍ତୁତ ଅନ୍ନ କୁ

ରାନ୍ଧି କରାଯାଏ ଭକ୍ଷଣ । (୬)

ଏହି ଗୋଟେ ଦିନ ମଦକୁ ତ୍ୟାଗଇ

ମଦ୍ୟପ ନ ଯାଏ ଭାଟିକୁ,

ଦେଶ ବିଦେଶରୁ ଭାଈ ବନ୍ଧୁ ସର୍ବେ 

ଲେଉଟନ୍ତି ଭିଟାମାଟି କୁ । (୭)

ସାନମାନେ ସର୍ବେ ମୁଣ୍ଡିଆ ମାରନ୍ତି

ଗୁରୁଜନ ପାଦ ଛୁଇଁ,

ନିଆରା ସଂସ୍କୃତି ପରମ୍ପରା ଦେଖି

ଧନ୍ୟ ହୁଏ ଜନ୍ମ ଭୂଇଁ । (୮)

ଘରର ବରିଷ୍ଠ ସମସ୍ତ ସଦସ୍ୟ

ସାନଙ୍କୁ ଆଶିଷ ଦିଅନ୍ତି,

ଆଶୀର୍ବାଦ ଦେଇ କନିଷ୍ଠ ଙ୍କ ଦୁଃଖ

ନିଜ ଶିରପରେ ନିଅନ୍ତି । (୯)

ଘରର ମୂରବୀ ବଢ଼ାଇ ଦିଅନ୍ତି 

ନିଜ ହାତେ ନବାନ୍ନ କୁ,

ଖାଇ ସଭିଙ୍କର ଆତ୍ମା ହୁଏ ତୃପ୍ତ 

ସେ ସ୍ଵାଦିଷ୍ଟ ଅନ୍ନ କୁ । (୧୦)

ଭୋଜିଭାତ ସାରି ଆରମ୍ଭ କରନ୍ତି

ଭେଟଘାଟ ର ସେ ପରବ,

ରାଗ ରୁଷା ଭୁଲି ଆଦରି ନିଅନ୍ତି 

ନ ଥାଏ ଟି ମନେ ଗରବ । (୧୧)

ସ୍ନେହ, ଶ୍ରଦ୍ଧା, ଶାନ୍ତି, ମୈତ୍ରୀ ର ଉଚ୍ଛ୍ୱାସେ 

ପୁଲକିତ ହୁଏ ମନ,

ଭାଇଚାରାର ଏ ସଂସ୍କୃତି ଆମର 

ଅପୂର୍ବ ଏ ଭାବ ବନ୍ଧନ । (୧୨)

ଓଡ଼ିଶାର ମୁଖ୍ୟ ପର୍ବପର୍ବାଣୀରେ

ନୂଆଖାଇ ଆମ ଗଣା,

ଓଡ଼ିଶାରେ ଆମ ଏଇ ନୂଆଖାଇ 

'ନବାନ୍ନ' ଭାବରେ ଜଣା । (୧୩)