Library
ଭାବରେ ଭକ୍ତିରେ ଭାଗବତ
ଭାବରେ ଭକ୍ତିରେ ଭାଗବତ
ବୈକୁଣ୍ଠେ ମୁଁ ନାହିଁ ନାହିଁ ଯୋଗୀର ହୃଦୟେ ।
ହେ ନାରଦ ଥାଏ ମୁଁ ମୋ ଭକ୍ତ ଯହିଁ ଗାଏ ।୧।
ଶ୍ରୀ ହରି କହିଅଛନ୍ତି ନାରଦଙ୍କୁ ଏହା ।
ଭାବରେ ଭକ୍ତିରେ ଭାଗବତ ହୁଏ ଠିଆ ।୨।
ଭକ୍ତି ମାତା ଜ୍ଞାନ ବୈରାଗ୍ୟ ତାଙ୍କ ତନୟ ।
ଭକ୍ତି ନଥିଲେ କି ଦୁହେଁ ହୋଇବେ ଉଦୟ ?୩।
ଅନନ୍ତ ଶୁଣିଲେ ଏକ ଶ୍ଳୋକୀ ଭାଗବତ ।
ବ୍ରହ୍ମା ଶୁଣି ଚାରି ଶ୍ଳୋକେ କରିଲେ ସେ ଖ୍ୟାତ। ୪।
ନାରଦଙ୍କୁ ଶୁଣାଇଲେ ସେହି ଚାରି ଶ୍ଳୋକ ।
ବ୍ୟାସଙ୍କୁ ନାରଦ ଶୁଣାଇଲେ ଶହେ ଶ୍ଳୋକ ।୫।
ବ୍ୟାସ ଅଠର ହଜାର ଶ୍ଳୋକ ତାକୁ କଲେ ।
ଶୁକମୁନି ଭାଗବତ ପ୍ରଚାର କରିଲେ ।୬।
ଶୁକ ମୁଖୁ ଭାଗବତାମୃତ ଝରିବାରେ ।
ପାନ କଲେ ପ୍ରାଣୀଏ ତା' ମହାଆନନ୍ଦରେ ।୭।
ଶୁକ ପରୀକ୍ଷିତ ସମ୍ବାଦ ଏ ଭାଗବତ ।
ଶୌନକ ମୁନି ପୁଛନ୍ତି କହୁଛନ୍ତି ସୂତ ।୮।
ଷାଠିଏ ହଜାର ୠଷି ଗଙ୍ଗାନଦୀ ତୀରେ ।
ଶ୍ରବଣ କରିଲେ ପରୀକ୍ଷିତଙ୍କ ସଙ୍ଗରେ ।୯।
ସପତ ଦିନ ଭାବ ଭକତିରେ ଶ୍ରବଣ ।
କଲେ ପରୀକ୍ଷିତ ତକ୍ଷକ ଦଂଶିଲା ପୁଣ ।୧୦।
ତକ୍ଷକ ଦଂଶିବା ପୂର୍ବୁ ଭାଗବତ ଶୁଣି ।
ତରିଗଲେ ପରୀକ୍ଷିତ ଭବତରଙ୍ଗିଣୀ ।୧୧।
ଦ୍ଵାଦଶ ସ୍କନ୍ଧରେ ବର୍ଣ୍ଣିତ ଏ ଭାଗବତ।
ବିଷ୍ଣୁଙ୍କ ପୂର୍ଣ୍ଣାବତାର କୃଷ୍ଣ ଲୀଳାମୃତ। ୧୨।
ଐଶ୍ଵର୍ଯ୍ୟ ମାଧୁର୍ଯ୍ୟ କୃଷ୍ଣ ଲୀଳାର ଆଖ୍ୟାନ।
ଜନମଠୁ ଶ୍ରୀକୃଷ୍ଣଙ୍କ ସ୍ୱଧାମଗମନ।୧୩।
ଭାବରେ ଭକ୍ତିରେ ଭାଗବତ ବିଦ୍ୟମାନ ।
ପ୍ରତ୍ୟକ୍ଷ ଶ୍ରୀକୃଷ୍ଣ ଭାଗବତ ମନେ ଘେନ ।୧୪।
ଆଦ୍ୟ ମଧ୍ଯ ପ୍ରାନ୍ତେ ହରି ଚରିତ କଥିତ ।
ମାତାଙ୍କ ଉଦ୍ଧାର ଲାଗି ଶ୍ରୀମଦ୍ ଭାଗବତ ।୧୫।
ଓଡ଼ିଆରେ ରଚିଲେ ଶ୍ରୀ ଜଗନ୍ନାଥ ଦାସ ।
ବ୍ୟାସ ବିରଚିତ ଯାହା ସଂସ୍କୃତେ ପ୍ରକାଶ ।୧୬।
ନବାକ୍ଷରୀ ଛନ୍ଦରେ ଏ ଭାଗବତ ବାଣୀ ।
ବିରଚିଲେ ଜଗନ୍ନାଥ ମାତା ଥିଲେ ଶୁଣି ।୧୭।
ସରଳ ତରଳ ବାଣୀ ପରାଣକୁ ଛୁଏଁ ।
ଘରେ ଘରେ ପରିଚିତ ଭାଗବତ ହୁଏ ।୧୮।
ଲୋକ ମୁଖେ ଭାଗବତ ବାଣୀ ପାଏ ଶୋଭା ।
ଭାବ ଭକତିରେ ହୁଏ ଭାଗବତ ଉଭା ।୧୯।
ଗୋବିନ୍ଦ ଗୋବିନ୍ଦ ଗୋବିନ୍ଦ ଏ ନାମ ଧର ।
ଭାଗବତୁଁ ଗଳେ ମକରନ୍ଦ ଝର ଝର ।୨୦।
ସେ ମକରନ୍ଦ ପାନେ ତରିଲେ ବ୍ରଜନାରୀ ।
ତାଙ୍କ ପଦେ ମନ ସଦା ରହିବ ମୋହରି ।୨୧।
ମନ ନିରନ୍ତର ଥାଇ କୃଷ୍ଣ କୃଷ୍ଣ ବୋଲି ।
ହେ କୃଷ୍ଣ ଉଦ୍ଧର ମୋ ଜୀବନ ଯାଉ ଚାଲି ।୨୨।
ଭାବରେ ଭକ୍ତିରେ ପାଠ କଲେ ଭାଗବତ ।
ଶୁଣିଲେ ବା ପଚାରିଲେ ଜୀବ ହୁଏ ମୁକ୍ତ ।୨୩।
ପରମ ବୈଷ୍ଣବ ଶାସ୍ତ୍ର ଶ୍ରୀମଦ୍ ଭାଗବତ ।
ଅଭ୍ୟାସ କରି ପଢିବ ଏହା ନିତ୍ଯ ନିତ୍ଯ । ୨୪ ।
ପଦେ ପଦେ ଅଭିବୃଦ୍ଧି ହୋଇବ ଆନନ୍ଦ ।
ଭକତି ଜ୍ଞାନ ବୈରାଗ୍ୟ ପ୍ରକଟିବ ହୃଦ । ୨୫ ।
ଧର୍ମ ଅର୍ଥ କାମ ମୋକ୍ଷ ଚତୁର୍ବର୍ଗ ଫଳ ।
ପ୍ରାପ୍ତ ହୋଇ ପ୍ରେମ ଭକ୍ତି ହୋଇବ ସଫଳ ।୨୬।
ଜୀବ ଯିବା ବେଳେ ପାଠ କର ଭାଗବତ ।
କର୍ଣ୍ଣପୁଟେ ଶୁଣି ଜୀବ ହୋଇବ ମୁକତ ।୨୭।
କୃଷ୍ଣ କୃଷ୍ଣ କୃଷ୍ଣ କୃଷ୍ଣ କୃଷ୍ଣ ମୋ ଜୀବନ ।
କୃଷ୍ଣ ବିନୁ ମୋ ଜୀବନେ ନଜାଣେ ମୁଁ ଆନ ।୨୮।
