ଶୀତ ଆଗତ

ହେମନ୍ତ ହେଲା ଗତ ଶୀତ ଆଗତ

ଉତ୍ତରୁ ହିମ ବାଆ ବହେ ନିରତ |

ଦିବସ କାଳ ହ୍ରାସ ରାତ୍ର ବର୍ଦ୍ଧିତ

କୁହୁଡ଼ି କାକରରେ ଧରା ମଣ୍ଡିତ |

ଆତପ ଅନଳରେ ସକଳେ ପ୍ରୀତ

ଛାଇକୁ ସଲିଳକୁ ହୋଇଲେ ଭୀତ |

ସାରସ ହଂସ ହ୍ରଦେ ହେଲେ ପୂରିତ

କୁମୁଦ କମଳରେ ସର ଶୋଭିତ |

ପାଚିଲା ଧାନ କ୍ଷେତ ସ୍ୱର୍ଣ୍ଣ ରଞ୍ଜିତ

ହୃଷ୍ଟେ କୃଷକ ମନ ଭାବବ୍ୟଞ୍ଜିତ |

ନାନାବିଧ ପରିବା ମିଳେ ପର୍ଯ୍ୟାପ୍ତ

ସୁଲଭ ଶସ୍ତା ଦରେ ହୁଅଇ ପ୍ରାପ୍ତ |

ଶୀତ ବସନେ ହାଟ ବାଟ ପୂରିତ

ପାଦରୁ ମସ୍ତକାନ୍ତ ସୁପରିହିତ |

ସ୍ୱଚ୍ଛଳ ଧନୀ ବ୍ୟକ୍ତି ବିଳାସ ରତ

ଗରିବ ଧନହୀନେ କି ହନ୍ତସନ୍ତ |

ଶୀତନିଦ୍ରାରେ ଭେକ ସର୍ପ ଆଶ୍ରିତ

ହାରି କୃଷକ ପାଶେ ଶୀତ ନମିତ |

ଆଖୁରୁ ଶାଳଘରେ ଗୁଡ଼ ପ୍ରସ୍ତୁତ

ଆବାଳବୃଦ୍ଧନାରୀ ମୁଖେ ଅମୃତ |

ଶୀତରେ ମହାଲକ୍ଷ୍ମୀ ବିଜୟ ମର୍ତ୍ତ୍ୟ

କୃଷକ ବଧୂ ମାଣବସାରେ ରତ |

ଶୀତ ଦୁଃଖଦ ନୁହେଁ ସୁଖ ଭଣ୍ଡାର

ଧାତାଙ୍କ ବରଦାନ ସୃଷ୍ଟି ବୃନ୍ଦାର |