ଖେଳ

ଆସରେ ପିଲେ ପଢିବା ଆମେ ଖେଳିଖେଳିକି,

ନାଚିଗାଇକି ଶିଖିବା କଥା ଭେଳି ଭେଲିକି |   

ଖେଳ ମଧ୍ୟରେ ସବୁକାମ ଲାଗେ ଆନନ୍ଦମୟ,  

ଖେଳ ହିଁ କରେ ସୁନ୍ଦର ସ୍ୱାସ୍ଥ୍ୟ, ସୁସ୍ଥ ହୃଦୟ |    

ଏ ଦୁନିଆ ହେଲେ ଖେଳପଡ଼ିଆ, ଖେଳାଳୀ ଆମେ,

ଜୀବନେ କେତେ ଖେଳିଛୁ ଖେଳ ରଖୁନା ମନେ |

ହାରିବା ସହ ଜିତିବା ଥାଏ ସବୁ ଖେଳରେ,   

ବିଜେତା ସିଏ, ନିଷ୍ଠାର ସହ ଯେ ଖେଳେ ମେଳରେ |

ଖେଳ ରହିଛି ଭିନ୍ନ ବୟସେ ଭିନ୍ନ ପ୍ରକାର,      

ଶିଶୁ ବେଳରେ, ଖେଳ ତାହାରj କଣ୍ଢେଇମାଳ |

ବାଲ୍ୟକାଳେ ଖେଳେସେ ସାଙ୍ଗସାଥୀ ମେଳରେ ,

ଖେଳେ ସେ ପୁଣି ଘର ଅଗଣା, ଦାଣ୍ଡ ଧୂଳିରେ |

ବାଲ୍ୟରୁ ଯେବେ କିଶୋର ହୋଇ ଖେଳଇ ଖେଳ,

ଖେଳ ନିୟମ ମାନି ଗଢ଼ଇ ଖେଳିବା ଦଳ |    

ଏହି ସମୟେ କବାଡି, ବାଗୁଡ଼ି, ଫୁଟବଲ,    

ତାସହ ବାଡମିଣ୍ଟନ, ହାଇଜମ୍ପ ଆଉ ଲମ୍ବ ଦୌଡ଼ |

ଏତିକି ବେଳେ ଯୁବା ବୟସ ପହଞ୍ଚିଯାଏ,    

କ୍ରିକେଟ ସହ ଭଲିବଲ, ଟେନିସ ସେ ଜାଣିଥାଏ |

ଖେଳକୁ ନେଇ ହୁଏ ବିଭିନ୍ନ ପ୍ରତିଯୋଗିତା,    

ଭଲ ଖେଳାଳୀ ବିଜୟୀ ହୋଇ ବଢାଏ ଗାଥା |

ଖେଳ ଆମର ଶରୀର ପାଇଁ ନିହାତି ଲୋଡ଼ା,

ଖେଳିବା ବେଳେ ଖେଳିଣ ପଢିବା ବେଳେ ପଢା |

ଖେଳିବାଦ୍ବାରା ସୁସ୍ଥ ରହେ ଆମଶରୀର,       

କିନ୍ତୁ ଖେଳଟା ନିଶ୍ଚେ ଶାରୀରିକ ହେବା ଦରକାର |

ଖେଳଦ୍ୱାରା ହୁଏ ରକ୍ତର ସୁସଂଚାଳନ,      

ନିୟମ ମାନି ନିୟମିତ ଖେଳରେ ଦିଅ ଧ୍ୟାନ |

କୁସଂଗତରେ କୁଖେଳ ଯୋଗୁଁ ହୁଅଇ ହାନି,

ଜୁଆଖେଳ ଓ ପବଜି ଖେଳ ମୋଵାଇଲ ଆଣି |

ଖେଳ ଅଟଇ ପ୍ରମୋଦପୂର୍ଣ୍ଣ କର୍ମ ଆମର,

ଆନନ୍ଦମିଳେ, ସତେଜମନ ସୁସ୍ଥ ଶରୀର |