କେମିତିଆ ବାହାଘର

ବଡ଼ ଚକିତ ହୁଏ ମନ ,ବିଚଳିତ ଦେଖି ନୂଆ ପ୍ରଥା ,

ମାତିଲେଣି ସବୁ ଆପଣା କରିବେ ,ରଚିବେ ନୂଆ କଥା |

ବାଜା ବାଜିବନି ,ଅନୁକୂଳ ନାହିଁ ,ନଥିବେ କେହି ବରଯାତ୍ରୀ ,

ବରଣୀ ନହୋଇ ବେଦିକୁ ଯିବନି ,ଏବେ ଏହି ରିତି |

ମଙ୍ଗୁଳା ନହୋଇ ନେବନି ମଙ୍ଗଳାଙ୍କ ଆଶିଷ ସେହି କନ୍ୟା ,

ବିନା ହୁଳହୁଳି , ଶଙ୍ଖ, ମହୁରୀରେ ବାହାହେବ,ତାକୁ ଅନା |

ସାଇ ପଡିଶା ଅବା ବଢ଼ୁ ବାନ୍ଧବ ଯେତେ ଥିବେ ,

କିଛି କରିବେନି ,କିଛି ଦେଖିବେନି ,ତୁନି ହୋଇ ରହିବେ |

ବର କନ୍ୟା ଦୁହେଁ କିଏ କେଉଁଠାରେ ,କେହି ନଜାଣଇ ,

ବାହା ହୋଇଯିବେ ଅନଲାଇନରେ ଖାଲି ,କେତେ ଅଡୁଆ ଲାଗଇ ?

ବେଦି ବନ୍ଦାପନା ,ହୋମ ଆଦି କର୍ମ ହେବ ନାହିଁ ,

ଖାଲି ଅଡିଓ ଭିଡ଼ିଓ ସବୁ କରିଦେବ ,ଦେଖୁଥିବୁ ଚାହିଁ |

ଶଳା ଶାଳି ଆଉ ଶାଶୁ ଶ୍ୱଶୁର ନପାରିବେ ଛୁଇଁ ,

ଚିହ୍ନ ପରିଚ ହେବାକୁ ଏବେ କାହାର ବେଳ ନାହିଁ |

ହାତଗଣ୍ଠି ଆଉ ବେଦିରେ ସେଇ ସାତଫେର ହେବ ନାହିଁ ,

ଖାଲି ଅଡିଓ ଭିଡ଼ିଓ ମାଧ୍ୟମରେ ,ହେବେ କୁହା କୁହି |

କଉଡ଼ି ଖେଳର କଥା ନଜାଣିବେ ,ସିଏ ହେବ ନାହିଁ ,

ବିନା ପ୍ରତ୍ୟକ୍ଷ ଦର୍ଶନରେ ,ହେବେ ପତି ପତ୍ନୀ ସେହି |

ହେବନାହିଁ କନ୍ୟା ବିଦା ,ତାକୁ କେହି ଝୁରିବେ ନାହିଁ ,

କେଜାଣି କେବେ କେମିତି ବର ତାକୁ ଯିବ ନେଇ ?

ଇଏ ସତ ବାହାଘର ଅବା ମିଛି ମିଛିକା ଖେଳ ,

ଏବେ କହିବାକୁ ଲାଗେ ଲାଜ ,ହୋଇଛି ତାହାର ବେଳ |

କେମିତିଆ ବାହାଘର ଅଟେ ସତ ?ମାନେନା କିଛି ରିତି ,

ସମୟର ବାହାନା ଦେଇ ,ଚାଲିଛି ଏବେ ନୂଆ ନୀତି |

କେହି ଜାଣିବେନି ,କେହି ମିଶିବେନି,ଏହା କେମିତିଆ ବାହାଘର

ପ୍ରଶ୍ନ ଉଠେ ଏବେ ,ଏମାନେ କେମିତି ଗଢିବେ ସଂସାର ।

ସେଥିପାଇଁ ଆଜି ହଟହଟା ହୁଅନ୍ତି କେତେ ଅବଳା ନାରୀ ,

କେମିତିଆ ବାହାଘର ଇଏ ? ଦେଉଛି ତାଙ୍କ ଜୀବନ ସାରି |

ମିଠା ମିଠା କଥାରେ ଭାସି ,କରନ୍ତି ଅନଲାଇନର ବ୍ୟବହାର ,

କିନ୍ତୁ ସ୍ବପ୍ନ ଭାଙ୍ଗି ଯାଏ ,ଯନ୍ତ୍ରଣା ଦିଏ ,କେମିତିଆ ବାହାଘର ।

ଯନ୍ତ୍ରଣା ପାଆନ୍ତି ମାୟାରେ ପଡି ,ଜୀବନ ହୁଏ ଛାରଖାର ,

ଏହା କେମିତିଆ ବାହାଘର ?ଯିଏ ମାନେନାହିଁ ସଂସ୍କାର ।