ଜନ୍ମଦିନ
ଜନ୍ମଦିନ
ଶୁଭ ଦିନ ରୂପେ ପାଳନ କରୁଛୁ
ଜନ୍ମ ଦିନ ତିଥି ପାଳି
ପୂଜନୀୟା ମାଆ ହରଷିତ ମନେ
ବନ୍ଦାପନା ହୁଳହୁଳି ।୧ ।
ପୁତ୍ର ହେଉ ଅବା ହେଉ ସିଏ କନ୍ୟା
ଜନମ ହୋଇଲା ଯେବେ
ସେଇ ଦିନ ତିଥି ଲଗନ ଭିତ୍ତିରେ
ପାଳୁଥାଉ ଆମେ ସର୍ବେ ।୨ ।
କାହିଁ କେଉଁ ଯୁଗ ଅନାଦି କାଳରୁ
ଚାଲୁଅଛି ଏଇ ପ୍ରଥା
ଗୁରୁ ଗୁରୁଜନ ଦେବ ଆଶୀର୍ବାଦ
ଅଛି ପରମ୍ପରା କଥା ।୩ ।
ଆଜି ଆଧୁନିକ ଦିନେ ପାଳୁଥାନ୍ତି
ଆନନ୍ଦରେ ଜନ୍ମଦିନ
ଷ୍ଟାର ହୋଟେଲ ରେ ପାର୍ଟି ଆୟୋଜନ
ଭୋଜି ସାଥିରେ ସାଫେନ୍ ।୪ ।
କେକ୍ କଟା ହୁଏ ସାଜ ଚାକଚକେ
ମୁଖେ କ୍ରିମ ବୋଳାବୋଳି
ଉଦ୍ଧାମ ବିଭୋରେ ଯିଏ ଯାହା ସାଥେ
ହେଉଥାନ୍ତି କୋଳାକୋଳି ।୫ ।
ବ୍ରେକ ଡାନ୍ସ ଚାଲେ ଅର୍ଦ୍ଧ ରାତି ଯାଏ
ସରେ ନାହିଁ ତାଙ୍କ ପାର୍ଟି
ଅବା ନିଶାଗ୍ରସ୍ତ ସଂଜ୍ଞାନ ହରାଇ
ହେଉଥାନ୍ତି ପିଟା ପିଟି ।୬ ।
ସ୍ମାର୍ଟ୍ ଫୋନ ସାଥେ ମେସେଜ ଦିଅନ୍ତି
ହାଏ ହେଲୋ ପ୍ରୀତି ଭାଷା
ଶୁଭେଛା ର ବାର୍ତ୍ତା ସୁଅ ଛୁଟୁଥାଏ
ଲାଇକ ସମ୍ମତି ନିଶା ।୭ ।
ବିଦେଶୀ ବାନ୍ଧବୀ ବନ୍ଧୁ ମାନଙ୍କର
ଦେଖିଲେ କମେଣ୍ଟ ଚିତ୍ର
ଲାଗେ ଆଧୁନିକ ଯୁଗର ପିଲାଙ୍କୁ
ଜୀବନ ହୋଇଲା ପ୍ରୀତ ।୮ ।
ଦେଖିଛକି କେବେ କୋଟି ସର୍ବହରା
ଫୁଟଫାତ ନଗ୍ନ ଚିତ୍ର
ଅନାହାରେ ଝୁରେ ସମାଜ ଦାଣ୍ଡରେ
ଲୁହ ଭରା ଦୁଇ ନେତ୍ର ।୯ ।
ନୁହେଁ କିବା ସିଏ ମଣିଷ ରେ ଗଣା
ନାହିଁ କିବା ତାର ମନ
ଅବା ସେ ଖୋଜୁନି ସ୍ଵାଧୀନ ସକାଳ
ରଙ୍ଗୀନ ଭରା ଜୀବନ ।୧୦ ।
ଅନାଥ ଶିଶୁଙ୍କ ପାଶେ ଯାଇ ଯଦି
ପାଳିବ ଜନମ ଦିନ
ଅବା ସେଇ ଦିନେ ଭୋକିଲା ପେଟକୁ
କରିଥିବ କିଛି ଦାନ ।୧୧ ।
ଧନ୍ୟ ହେବ ଜାଣ ଜନ୍ମଦିନ ତୁମ
ଝରିବ ଆଶିଷ ବାରି
ଲୋକ ହିତ ପାଇଁ କର୍ମ କର ସର୍ବେ
ଆଦର୍ଶ ହୁଅ ସବୁରି ।୧୨ ।